Ki 13 ngut ki warep kiwa na Ri Bhoi/Social Service Centre, Shillong da yah yaki cha ka chnong Mulum, Laskein Block, West Jaiñtia Hills haka 19 tarik uni u bnai yow yahcem wei ya tipmit lang para warep heiwa da emlang leh ki 9 ngut ki dkhot ka Iaraplang PGS Group na Mulum ha katai ka sngi.
Ya ini da pynman daka Social Service Centre, Archbishop’s House, Shillong deiwa ya krehlang waka Society For Urban & Rural Empowerment (SURE) deilang waka North East Slow Food & Agrobiodiversity Society (NESFAS) hapoh ka thong kreh kawa tip kam ka “No one shall be left behind: Biodiversity for food, Nutrition and Energy Security” kawa da kyrchaan poisa daka Rural Electrification Corporation Foundation (REC).
Da pynyoo leh cha kiwa wan yaka thaw pynlang chyieñ kawa tip kam ka Iaraplang Community Seed Bank yow pynneh pynsah ya ki jhoor wa man tynre. Da pynman leh yaka e kylliang yaki chyieñ jhoor hapyrdi kini ki arliang.
Da em leh ka pynyoo kammon da chet yei baam tynre da ki arliang heiwa ka Iaraplang PGS ka Mulum da chet ki yei baam daka sla Mahek waka chru katwa kiwa na Ri Bhoi da chet ki daka pachor wa i ktung. Da ya khana leh yei rukom rep kamjooh chaphang ki kaam wa da leh ki kiwa da man iwa jop.
