Ka phlim thymme wa da pynmih na Ri-loom Jaiñtia wa pyrtuid ‘Ka Chithi’ kawa da sdang pynyoo paidbah ini wa dep ha ka 1 tarik u Khonchonglad ha Jowai wei hadien wa da dep lai pynyoo ka cha 10 tylli kiwi ki chnong wa em ha Ri-loom Jaiñtia da wan wow pynyoo biang ya ka haka 18 tarik uni u bnai ha Jowai wei daw pteiñ hadooh ka 23 tarik uni u bnai ha Auditorium District Library, Mynthong, Jowai soo sien chi sngi heipor 2:00 waje i sngi, 4:00 waje noh chariñ ka sngi, 6:00 waje i janmiet wa heipor 8:00 waje i miet.
Ha ka sngi sdang pynyoo da yoh laad u yaklam wa ki kattu katni ngut kiwa embynta ha kani ka phlim wa kynthup nadooh kiwa wan pait ya kani ka phlim wa kiwa emkti wow pynkhreh wow pynwandur nadooh wa sdang i lai luti ki wym tipmit næ yoh ki paidbah u yoo.
Ka Ekratia Khongthiang, ka Some Marry Dkhar, u Synranki Najiar wa u Iahluti Dkhar da khana ki ya jar jiar i bynta wa da ak ki wei kyntu ki leh yaki paidbah wow wan sakhi wan e kyrchaan ya kani ka phlim neibhah man ko kawa myntoi yaka imlang sahlang.
Ka Simi Khongthiang kam ka Director kawa da jooh thoh wei pynmih boon ki phlim, ong ko ha kani ka phlim chem ko wa da ye ko u pynphær na ki phlim wa da pynmih ko nachwa wei da ye haroh ko u pynwandur lut yeiwa da angnood ko.
Heijooh i por khana haroh ko yei yaphær i lai luti ko haki phlim wa nachwa yong ka wa kawa katni ‘Ka Chithi’.
Neiliang u Kamki Diengdoh leh kam uwa embynta hei wow riñ dur, da pynsñiaw u yei lai luti yong oo hei kaam riñ dur ha ki por nachwa wei wa katni, heiwa da em boon i yaphær iwa da wanrah chooh chooh yei miat i yoosuk.
Discussion about this post