Ka Federation of Khasi Jaiñtia and Garo People (FKJGP) seiñbei hadien wa tip ko wa daw em ka yalang wa da khut ka sorkar MDA-II wow embyntalang da waroh ki seiñ saiñ pyrthai mynstep ka 19 tarik yow pynche hajrong ka Roster System kawa man ka phang kawa da pynkhih yei pyrkhat pyrdaiñ ki khon khynroo khyllood kiwa da yooluti yei hok yoh kreh sorkar.
Neiliang ka seiñ da pynsñiaw ko yei wym sñiaw yahaap u pynkrehkaam ya ka Roster System deiwa kheiñ nadooh u snem 1972 hadien wa da pynmih hukum ka Meghalaya High Court wa emkaam wow em ka Roster System hawa pynkrehkaam ya ka Reserevation Policy.
Ka FKJGP da kyntu joor ko ya waroh ki seiñ saiñ pyrthai kiwa em hapoh yong ka jylla Meghalaya wym toh u kynrandien ki deiwa pyrkhat jngai neibynta ki 50 tylli ki snem kiwa chakhmat deiwa lai cha katai ka yalang khlem pep yow pyntikna wym em i noh chilliang.
Ka FKJGP da dawa ko leh na ka sorkar MDA wa i pynbait thymme ya ka Roster System toh u man ko katkam i boon paaid khnang wa ki khon khynroo khyllood ymtoh u man ki kam ki langkñia yow yoh ki yei hok i bhah ha ki kaam sorkar wei heijooh i por ka FKJGP da dawa ko na ka sorkar jylla wa ya ka Roster System toh u pynkrhehkaam deiwa kheiñ chakhmat ymtoh chadien.
