Ka Joint Action Committee (JAC) of MeECL Suppliers and Contractors ynne ka sngi da kyrpaad ki ya u Power Minister, u James PK Sangma wa toh u pyrkhat chwa ya ki bru ka jylla hawa pynkreh ya kiwa boon ki Scheme hapoh ka jylla.
“Da kyntu i ya u Power Minister wow chong pait biang yaki Policy wa kiwi ki thong krehkaam mynstep mankawi heiwa toh u e laad chwa cha ki Contractor wa ki Supplier ka jylla,” da ong u Chairman ka JAC, u H. Rumnong hawa yaklam wa kiwa thoh khubor hadien wa yachem wa u James ha kamra krehkaam yong oo ynne ka sngi.
Da ong u ha kini ki sngi ya ki kreh da pynkreh kam ki Turnkey Projects hapoh ka MeECL.
“Kini ki Turnkey Project toh i kreh heiwa waroh i kreh da boohlang ha iwi donhi wei da e leh cha kawi donhi ka Company. Ka Company won da yoh ko yaki mar wa emkaam pyn naki bru wa ki Contractor wa ki Supplier yoh ki. Tangwa kini ki Company won da e ki yei kreh cha ki Contract ka jylla hi. Kamtæ kini ki Company wa heh kiwa yoh Contract da yoh myntoi ki deiwa kreh ki Contractor ka jylla,” da khana u JAC Chairman.
Chooh chooh da ong u wa ka Saubhagya Scheme toh kawa emkaam bha kawa ki bru ka jylla leh ye ki wow leh da ki hi. “Hadooh 24% i kreh hapoh ka Saubhagya Scheme toh iwa da leh nyngkong da ka chnat lyngba ki Supplier wa Contractor ka jylla. Katni won manda e Contract yow pynkrehkaam yaka Saubhagya Scheme, da e cha ki Company wa heh heiwa i da mut i wa daw pynemkaam da ki kor yow smat i kaam. Tangwa ini ym em jia i. Ka Saubhagya Scheme man ko ka nongmuna wa ki kaam taan bordiñ toh u e cha ki Contractor ka jylla,” ong u Rumnong.
Da pyntip u leh wa ka JAC da rai ko wa ki Supplier kamjooh ki Contractor ym lai ki dei yong samen cha kiwon kiwon ki Company kiwa da wan wow kreh yaki kaam bordiñ wa ki Scheme ha Meghalaya. U JAC Chairman da pynrap u wa ki Company wa heh kiwa ym du napoh India wot hadooh na baar ri toh u wan ki yow chna ya iwa emkaam. “Tangwa heiyatoh won wow taan bordiñ, ki bru ka jylla kiwa ye wow leh ya ini toh u chah u leh ki ya ini. Deiwa pynkreh leh da ki bru ka jylla hi yow lait ka poisa ka jylla wow lai cha kiwi,” da pynsñiaw u Rumnong.
Da khana u leh wa da dep lai rah leh yeiwa pyndam yaka Work Order yow chna yaka 32 KV Mawlai Sub-Station.
“Ka Work Order yow kreh yaka 32 KV Mawlai Sub-station toh kawa da pynmih ha u Naisaphra wa u Naichiphaw 2019. Hadien 6 bnai yaka Work Order da pyndam haka 03-03-20. I kreh wa da pynbiang tiar wei da kreh da poi ko T. 2.46 klur. Man i iwa sñiawsih da leh ka Board of Directors ka MeECL kamni khlem da khana biah. Ini man ko prchah yaka aiñ,” da ong u JAC Chairman.
Tangwa da ong u wa u Power Minister da kular u wow chimkhia ya ini yow pyntikna wa daw pyndam yeiwa pyndam yaka Work Order.
