Jowai: Hanla ka Indefinite Strike næ i yakhih wada khut pynman daka seiñ kiwa yah kari kamai da man ko kawa lai bait ha Shillong kam chibynta u pynyoo yei pyrchah joor yaka sorkar hajrong i ku bai phniang kari, tangwa ha Jowai won da sakhi wym em man ko kawa lai bait neibhah wa du ki Local Taxi wa ya ksohkti katwa ki kari Tourist won lai bait i kamai yong ki tangwa duna ki.
Neidaw wa sangeh kamai ki Local Taxi wei duna i kamai ki Tourist Taxi ha Jowai ynne ka sngi, da sakhi wa ki yaw ki haat ki luti syngkieñ leh duna ki bru kamjooh ki kari.
Hei yaklam wa u President ka All Jaiñtia Tourist & Commercial Vehicle Association u Pailakordor Lyngkot, ong u wa neiliang yong ki wym em yoh ki kawon kawon ka yutip wa daw em ka Strike, wa hadooh ynnin ka sngi hadien wa da bna wow em ka Strike ha Shillong, ki leh smat smat da khut yalang ki yaki President yong ki seiñ kiwa kamai kari waphær ka Ri-loom Jaiñtia wei hadien i yaklam sani da chim ki yaka rai yow lai bait i kamai ynne ka sngi.
“Hei yong sakhiat hi, i leh kwah hi i wow yakrehlang wow e kyrchaan heiyatoh wa i pyrchah yei ku dor i phniang kari wa ki dan wa boonjait, tangwa neidaw wym yoh yutip wa tikna ym ye i wow pynkrehkaam yaka Strike,” ong u Pailakordor Lyngkot.
Hawa kylli won yei daw wa duna ki kari Tourist wot hawa da chim yaka rai u lai bait i kamai ynne ka sngi leh, da jubab u wa ini ye u man neidaw wa ki paidbah sñiawthooh bakla ki wei wym em yoh ki yei yutip wa biang.
Kamtæ heiyatoh wa ini, ong u wa daw chong biang yei yalang neibynta u chim da kawi won ka rai mynstep mynkawi lada ha Shillong u pteiñ ki yei yakhih.
Heiyatoh wa ki kari wa kamai Jowai-Shillong won, da yohlaad u yaklam wa u Secretary ka Jowai Shillong Tourist Cab Association u J. Lyngdoh uwa da ong, “Khyrngiat i hawa yoo yaka rai ha Shillong iwa ong wow sangeh kamai, i sah i hei doom neibhah wym em yoh i kawon kawon ka yutip wei yaki kari wa kamai Jowai-Shillong leh wym em ong i iyi iyi tangwa chnong hei sñiawthooh uwa yah kari”.
Neiliang u Secretary ka seiñ kiwa yah Local Taxi wa tip kam ka West Jaiñtia Hills Taxi Owner Divers Association WJHTODA, u W.J. Nongbri, khana u i sangeh kamai yong ki ynne ka sngi toh wa haka yalang wada chah khut ki ha Shillong da rai u ya ksohkti lang hajrong i yakhih pyrchah yei ku dor ka bai phniang kari.
Chooh chooh khana u wa ynne ka sngi neiliang yong ki da yieñ ki ha laad Kiang Nangbah Govt. College, Jowai, ha Iawthymme, ha Iaw warim wei kyrpaad haroh ki yaki kari kamai Tourist wow dam ki u kit bru ki Local Taxi, tangwa toh u lai bait ki na Stand ha Stand.