theme-sticky-logo-alt
theme-logo-alt
Advertisement ad1

Ya kylliang symbe tynre ki warep ha Mulum

Advertisement ad1

Ki warep kiwa ha i jooh i por leh kiwa pynlang ya ki symbe ha ki thaw pynlang symbe kiwa em ha ki chnong yong ki kiwa tip leh kam ki Community Seed Bank (CSB), da wan ki wow yachem yow kylliang symbe para ki. Ya kani ka yalang ya kylliang symbe da pynman haka chnong Mulum kawa haap hapoh ka Laskein Block yong ka West Jaiñtia Hills District. Kiwa pynlang symbe na ki chiphaw tylli ki chnong na East Khasi Hills, Ri-Bhoi District, West Jaiñtia Hills District da ya chimbynta chitrhem ki ha kani ka yachem wow ya kylliang symbe.

Kini ki warep toh kiwa wan na ki chnong kiwa da krehkaam da ka North East Slow Food and Agrobiodiversity Society, Shillong deiwa kyrchaan ka Social Service Committee, Shillong waka Society for Urban and Rural Empowerment, Jowai lyngba ka Project kawa da e pyrtuid kam ka ‘Empowering Indigenous People through Agroecology Learning Circle for Resilient, Integrated and Innovative Natural Resource Management’ ya kawa da kyrchaan poisa da ka World Bank lyngba ka Meghalaya Basin Management Agency (MBMA). Ka bynta wa kongsan ha kani ka sngi toh i khana parom chaphang ki symbe kiwa ki warep da pynlang ki ha ki thaw pynlang symbe kiwa em ha jar jiar ki chnong ki.

Haka yalang ki dkhot yong kini ki kynhun pynlang symbe da ya saam leh ki khana parom chaphang i pynlang symbe yong ki wei kamjooh leh chaphang i jait thung wa kongsan ha ka thaaiñ yong ki. Ka Kitboklang Suchiang da pyntip ko chaphang ka Community Seed Bank yong ki haka chnong Mulum kawa da sdang nadooh u snem 2019.

Ka Ambiuos Umsor naka chnong Khapmaw kawa haap hapoh ka Mawkynrem Block yong ka East Khasi Hills da pyntip ko chaphang ka Community Seed Bank (CSB) kawa dang sdang ha u snem 2021. Ka Bibiana Rani naka chnong Nongtraw, East Khasi Hills da pyntip ko chaphang ka CSB yong ki kawa da em hadooh 200 jait ki symbe. Na Garo Hills da yoh i klam na u Willy B Marak uwa na ka chnong Darichekre wa ka Thunila CH Marak kawa na ka chnong Daribukre kiwa waroh ar ki chnong kiwa na West Garo Hills.

Kiwi de kiwa da klam ha kani ka sngi toh u Nestar Kharmawphlang na Lait Sohpliah EKH, ka Komida Rynjoh na Rableng, ka Sita Merry Nongrum na Umsawar waroh ar na EKH, ka Daphi Merry Lyngdoh na Pahamshken, Ri-Bhoi District wa u Kynsaiborlang Shadap naka chnong Madanrtiang na Ri-Bhoi District.

Hachwa ini, da pynman ya ka yalang heiwa da yoh i klam na u Dr. H.H. Mohrmen Secretary SURE, u Pius Rani, Executive Director NESFAS, u Arwanki Mawlong, Assistant Manager Knowledge Management MBMA wa u Diki Suchiang, Secretary Dorbar Chnong Mulum wa ka Hamsniawpher Suchiang, President CSB, Mulum wei ya ka yalang da pynlai da ka Rimaia Suchiang ka dkhot yong ka CSB, Mulum. Ha kani ka sngi ym du ki warep kiwa ya kylliang symbe tangwa da thied leh ya ki symbe ki wym em ki wei waroh ki symbe toh ki symbe tynre kiwa yoh pateiñ na ki bei ki pa yong ki.

Advertisement ad1
Share this:
Previous

Da toh pynhaap ya ar tylli ki chabi kari

Next

COVID-19: Hiar kiwa dang chah ktah hapoh 15,000 ngut ha India hadien 707 sngi