Hajrong ka thong wow ngam yillu ya ka mang tangka ka sorkar da ki bru chemphang kamjooh ki khynnah wow sñiawthooh ki yeiwa emkaam ha ki bynta ka mang tangka, ka Econ Club yong ka Department of Economics, Commerce and Management, Martin Luther Christian University da lehwarom ko ya ka World Economics Day 2022 hapoh kani ka skurbah deiwa pynman ya i phyllu yumut ya ka ‘State Budget of Meghalaya, 2022-23’.
Ki bru chemphang ha kani ka sngi kynthup ki ya u Dr. Jemino Mawthoh, Associate Professor, NeHE; ka Eliza Dutta, Asst. Professor of Indian Institute of Public Health (IIPH) wa ka Rosanna Lyngdoh, Director of Impulse NGO Network.
Da yoh ya ki kyntien lamphang na u Dr. V. T. Darlong, uwa jooh man kam u Vice Chancellor warim ka MLCU, uwa da klam hajrong ka mang tangka ka sorkar India wa ka thaaiñ mihsngi.
Kiwa klam ha kani ka sngi da ban joor ki wa emkaam wow pynkhlan ya ki kaam wa yatoh wa i chait i khiah, ki khynroo wa i yoh kreh, ki kaam pynroi, i kylla i suiñbneiñ wa kiwi kiwi.
