Ki dkhot ka Meghalaya Cricket Association (MCA) ynnin ka 5 tarik da lai hiar ki cha East Jaiñtia Hills yow sakhi wei pynskem ya ka soskular hapyrdi ka chnong Mookhep wa ka East Jaintia District Cricket Association (EJDCA).
Da kani ka soskular, ka dorbar chnong Mookhep da smat ko wow e ya ka madan yong ka chnong cha ka East Jaintia District Cricket neibynta 30 snem.
Ha kani ka sngi da wan e mynsien da u Deputy Commissioner ka Khliehriat heiwa neiliang ka EJDCA da e khublei kyrpang ko ya u waheh chnong yong ka Mookhep neibhah hapoh i yalam yong oo, ka dorbar chnong da smat ko wow e sñiawbha ya ka madan. Kamjooh da e khublei sñiawbha ya ka MCA kawa da yarap chiboon ya ka EJDCA khamtam hawa pdiang ya ka EJDCA wow man kam kawa da tipmit daka MCA.
Ki dkhot ka MCA kiwa da emlang toh u Naba Bhattacharjee, Convener BCCI Task Force, u Gideon Kharkongor, Hony. Secretary Meghalaya Cricket Association, u Dhhruva Thakuria, Treasurer MCA, u Rayonald Kharkamni, Chairman Ground and Pitch Committee, u O.L. Warjri, Member Ground Committee MCA deiwa emlang leh u Eddie Shylla, President AJCA.
