Ka seiñ Meghalaya People United Front (MPUF) Khliehriat Circle, hei emlang u MDC ka Rymbai Khliehriat Constituency u Finelyness Bareh, u President rangbah ka (MPUF) u Dapoiwanmi Laloo, u General Secretary ka seiñ u Aimon Syad waki dkhot, ynne ka sngi da yachem biang ki ya u DC ka East Jaiñtia Hills u E. Kharmalki yow pynkynmoo biang ya oo heiyatoh wa i thoh wa dep e ka seiñ ha kani ka tayaw wada dep yow dawa luti lai kjat namo ka Footpath hapoh yaw Ladrymbai.
Hadien i yachem ka seiñ wa u DC, neiliang yong oo da ong u wa da pyrchang u wow chimkhia yeini i kaam katwa ye u wei ym em u chong klikti wei ynne ka sngi da khut yalang u ki ki waheh chnong ka Ladrymbai deilang wa ki Traffic Police ka District wow yaklam yeini i eh u paidbah, khamtam leh yow thooh ki laad ki luti wow kyrriah thaw ya kitu ki wa chongdai ha rood yong u sarok yow yoh thaw wow chna Footpath yow lait nei jia wa sñiawsih.
U Blah neiliang ka seiñ da e khublei u ya u DC heiyatoh wa ini i kaam wada chimkhia u wow pait yaka District waroh kawi ya ini i dawa ka seiñ, da ong chooh chooh u ka seiñ daw booddien ko hadooh wa jop yein i kaam khnang yow man ko kawa pynsuk ya u paidbah wa lai wa wan hapoh yaw Ladrymbai yow lait leh nei jia wa sñiawsih neibhah ka yaw Ladrymbai man ko leh kawi na ki yaw kawa heh hapoh District.
U Finelyness Bareh uwa man leh u MDC ka Khliehriat Constituency hawa klam u da e u i yaroh yaka seiñ wada smat ko wow pait neibynta i bha i miat hei imlang sahlang khamtam ya u Blah uwa da smat wow pait neibynta i eh u paidbah, da ong u leh ha-o sakhiat ka yaw Ladrymbai man kawa heh bha tangwa kat yaka luti won hap lai lang ki kari waki bru neidaw wym em Footpath, da ong u leh wa ha O samen leh da yoo u da ki khmat yong O wa ki paidbah hadooh katwon chem chitom ki hawa lai yaw wan yaw ki ha katai ka yaw neidaw wym biang i thaw lai kjat, da ong u leh ini da booh ko hei maa ya ki paidbah khatam heipor miet, kamtæ da ong u leh neibynta i kaam wa bha, O leh smat u wow emlang wa kiwa yahkhmat yong ka chnong Ladrymbai khamtam waka seiñ MPUF.
