Ka JYF (CB) ynne ka sngi hapoh i yahkhmat u President Rangbah yong ka u O.L. Tariang wa u Dawyoo Lyngdoh u Education Secretary (CB) da lai yachem ki ya u Director yong ka DHTE & DSEL Shillong hajrong i eh wa ki khynroo khyllood wa dang lai puræ da maad ki hapoh Ri-loom Jaiñtia.
Ha ini i yachem da yoh wow ya syllok rap sani bha heiwa neiliang u Director da kular u wow chimkhia ya ini i kaam. Neiliang u O.L. Tariang da ong u wa lada kamni cheiwon u yah ko ya ka mynried kiwa lai puræ lada ki skur ki College ym pdiang ki ya ki khamtam ha kam ini i por wa ki manyung da maad ki yei eh ha ki liang waroh neidaw wa chah ktah ha ka khlam COVID-19.
Neiliang u Dawyoo Lyngdoh da ban joor u ya ki bor wa toh u pait ya ki kaam puræ puthi wow chim khia ya ini i kaam neibha lada kiwa lai puræ ym yoh thaw ki, daw wanrah ko yei sñiawsih wa khroo wei daw booh sa ya i kylli wa khroo kammon ki khynroo u tei ki ya ka mynried wa tyrchaaiñ. Chooh chooh da kyrpaad u ya ki khynroo khyllood wa ki bei ki pa wow yaichah ki wei wow ya krehlang wei da yooluti wa ki bor wa toh u pait ya ka chnat puræ puthi daw pynbait smat ki ya ini i kaam.
