Ynne ka sngi u Speaker ka Lok Sabha, u Om Birla da wan u cha nongbah Shillong wei ha i janmiet da yachem u wa ka CoMSO kawa da pynkynmoo ya oo wow pynkrehkaam noh ya ka Inner Line Permit (ILP) ha Meghalaya.
Ha kani ka yachem da kdaw wa soo tylli ki jylla ha ka thaaiñ mihsnhi da pynkrehkaam ya kani ka aiñ kawa sariem wa ka Bengal Eastern Frontier Regulation Act 1873 wei ka yung dorbar chna aiñ ka jylla leh da pdiang ko ya ka Resolution hajrong i pynkrehkaam ya ka ILP.
Da pyntip leh wa emkaam ya u Lat ka jylla wow pdiang ya ka Meghalaya Residents Safety and Security (Amendment) Bill, 2020.
Ka CoMSO da pynkynmoo ko leh wa emkaam wow tipmit wei wow kynthup noh ya ka ktien Khasi wa Garo ha ka Eight Schedule ka riti synchaar ka ri.
Heijooh i por da kyntu leh wow pynbait noh ya u pood ka jylla wa ka ri Bangladesh kamjooh leh wa ka jylla Assam wei da kyntu leh wow pynkhlan wei wow pynkylla ya ka Sixth Schedule ka riti synchaar ka ri.
Da kyntu leh wow pynman ya ka jylla Meghalaya waroh kawi kam ka Tribal Area deiwa e nuksa wow pyndooh noh ya ka Shillong Normal Area namo ka Municipality kiwa toh u haap hapoh i pait ka KHADC.
Chooh chooh da kyntu leh ya ka sorkar wow ebor ya u Lat ka jylla wow pynlait wei wow pynkylla ya ki aiñ ka Parliament hapoh ka jylla Meghalaya.
Da yaklam leh hajrong kiwi ki kaam wa yatoh wa ka jylla.
Neiliang u Birla da kular u wow yaklam yeini wa ki bor sorkar wa toh u pait ya kini wei da ong u leh wa daw rap miat lada ki MP ka jylla u klam ki ya kini ki kaam ha Parliament.
