Ka Delina Khongdup kawa man kam ka dkhot namo ka Member ka National Women’s Commission yong ka sorkar India, ynnin ka 31 tarik da yooh kjat ko ha Jowai wow yachem ya ki Seiñ Kynthai ki Seiñ Manbei wei wow pynsñiawthooh leh ya ki chaphang ka phang yong ka International Women’s Day 2023 kawa ong “DigitAll Innovation & Technology”.
Hei sakhi ya ka yalang wa da pynman da ka Seiñ Kynthai Loomiongkjam, Jowai ha yungwalieh da wan chimbyntalang ki khyllood ki manbei wa kiwa waheh wasian ka Loomiongkjam wa kynthup yow Mehi Challam, Waheh Chnong ka Loomiongkjam ka J. Synnah, District Social Officer West Jaiñtia Hills.
Ka Juliana Challam, Chairperson ka Seiñ Kynthai Loomiongkjam kam ka chongknor da e ko ki kyntien yahkhmat wei da khana ko yei parom wa tbian i lai luti ka seiñ.
Kam i dak pdiang burom ya ka Delina Khongdup, ka Seiñ Manbei Loomiongkjam da chim ko leh u pynkup burom ya ka deilang yow Khroo Lamsalanki Pariat wa ya u Womlin Pakyntein uwi na ki waheh wasian ka dong Loomiongkjam wei kam wow kdar luti ya ki bynta wa chakhmat yong ka yalang, ka Ridaka Lamar, dkhot ka seiñ manbei da yieñ ko wow e i ngoohblai ngoohsyiem katwa u Womlin Pakyntein da e u ki kyntien niawtang ya ki kaam wa khroo yong ki manbei, ki khon kynthai hapoh ka dong ka chnat, u loom u pdeiñ.
U Khroo Lamsalanki Pariat hei klam ha kani ka yalang najrong ki kyntien pynjoohkhe ya ki kynthai ki manbei ya kiwa boon ki bynta wa kyrpang, da kyrpaad u ya ka Delina wow rah wyrta ko hakhmat ka Commission yei kyrdan wei man kyrpang ka jaitbru kawa e jait cha ka Bei wei wow yasaaid leh yei hok wei eh i khoo iwa ki kynthai næ ki manbei hapoh ka jylla hap ki u maad u chem na ki por cha ki por.
Ka Delina Khongdup hei e kyntien da ñiawtang ko yei naam u Kiang Nangbah wei ong ko leh man iwa sñiawsarong wow yoohkjat hapoh ka chnong Jowai, ka chnong kawa da sai da pynmih yow Khlawait ka ri.
Neitæ hei klam i batai won chaphang ka DigitAll Innovation & Technology da khana ko wa i daw wa chim ka Commission wow booh ya kani ka mat kyrpang toh wa yoo ko kat nangmih ki sngi i sih wa boonjait boon rukom mih ki lyngba i tip yong ki bru wow pynemkam ya ka juk stat sayan wa katni namo ka Technology heiwa kiwa boon ki khon kynthai man kiwa chah ktah na kani.
Chooh chooh ong ko leh ym myntoi wow yoh i ya ki hok næ u chna u booh ka sorkar ya ki aiñ yada neibynta yong i ki kynthai lada ymtip wan i u pynemkam ya ki.
