Ka Ri-Bhoi da ye ko wow em hakhmat yaka East Jaintia Hills hadooh wa kut ka yalehke ka sngi nyngkong ka Inter-District U-23 Cricket Tournament ha Nongpoh ynne ka sngi, heiwa ka EJH da hap ko wow leh yaka Follow-On wei dang bood ko da 145 Run nadien.
Katwa ha Mendipathar ka yalehke man ko kawa ya thaaiñ bha heiwa ka South Garo Hills da tam ko yaka South West Khasi Hills 34 Run hadien wa kut ka Innings wa nyngkong ya waroh arliang.
Haka Zone 1, ka Ri-Bhoi da jop ko yaka kylla khlem wei da jied ko wow Bat nyngkong heiwa da kamai ko 244 deiwa dooh ya waroh ki Wicket, heiwa u Bibek Powdel da kamai u 120 Run na ki 99 bol uwa da yoh lok lang wa u Laxman Gurung uwa da kamai 42 Run. Na kiwa kawang bol, u Saroj Raut (6/64) toh uwa da lehbha dooh ya ki EJH.
Na kiwa kawang bol ka Ri-Bhoi, u Ram Gurung (6/25) da yarap u wow pyndooh yaka EJH hadien wa kamai 63 Run iwa da em chadien da 181 Run. U Peter Sangma toh uwa kamai Run boon dooh yaka EJH uwa yoh 17 Run.
Hawa leh yaka Follow-on, ka East Jaintia da yoh ko 36/2 hadooh wa kut ka yalehke ynne ka sngi, deiwa emkaam sa 145 Run yow phah Bat biang yaka Ri-Bhoi sa chisien.
Haka Zone 2, ka South West Khasi Hills da jied ko wow Bat nyngkong hadien wa jop yaka kylla khlem wei da kamai ko 140/9 (uwi uwa Bat da hap u wow dam neidaw wa mynsoo). U Pyntngenlang Lyngdoh da kamai boon Run dooh u da 26 Run. U Chengsrang S Marak da ka bol da yoh u 3/28.
U Jopborlang Lyngdoh won da lehbha u daka bol yaka SWKH uwa yoh 5/28 deilang wa u Shanborlang Dkhar 3/38. Kiwa Bat ka SGH da jubab ki deiwa kamai 174 deiwa dooh waroh ki Wicket, iwa da e yaki wow tam da 34 Run. U Gideon Marak wa u Richard N Sangma da kamai ki mar 32 Run.
