Ynne ka sngi ka Synjuk ki Waheh Chnong Jowai hapoh i yahkhmat u President u A. Niangti wa u Secretary, u Riquoma RQ Laloo da yachem ki ya u DC ka West Jaiñtia ha kamra krehkaam yong oo ha Jowai hajrong ki kaam wa yatoh wa ka Jowai.
Hadien i yachem neiliang u Niangti da ong u wa i yachem toh da yaklam hajrong i tympleh bordiñ heiwa da kyntu wa neini chaphrang ymtoh u tympleh ya ka bordiñ hei miet neibhah wa ktah ko ya ki khynnah kiwa puræ kot wa i sngi neibhah wa ktah i ya i kreh wa ki kaam ki bru.
Da ong u leh wa da yaklam leh hajrong i jakhlia ka wah Myntdu heiwa u DC da kular u wow khut yalang ha ka 26 tarik hajrong i kaam wow yada ya kani ka wah heiwa daw khut ya ka Municipal, ka chnat Urban Affairs, ka JHADC wa kiwi kiwi hajrong ini i kaam.
U Niangti da ong u wa da yaklam leh hajrong i chim kabu kiwa kamai kari neibhah i dor wa booh da ka sorkar toh neibynta i Reserve kari tangwa katni da kheiñ ha ini i dor samen na uwi pa kawi neibhah ha Jowai da em dabka Share System. Da pynrap u leh deiwa ong wa u DC da kyntu u wa lada em kiwa chim kabu emkaam wow ujor cha ki bor ka aiñ wow pynchitom ya ki.
Da yaklam leh hajrong kw Tower Light kawa em ha yung krehkaam u DC kawa da sih kattu da boon snem wei da yaklam leh hajrong ka yingkieñ naar wa pynyabi ya ka Marian Hills HSS wa ka St. Marys Mazzarello kawa ym em de u pynemkaam kawa da booh hei maa ya ki paidbah.
