Ynne ka sngi ki MDC ka Voice of the People Party (VPP) na ka JHADC hapoh i yahkhmat u A. Andrew Shullai da lai yachem ki ya u Deputy Commissioner ka West Jaiñtia Hills uwa man leh u Chairman ka District Selection Committee (DSC) hajrong i tyngkhooh tarik ka Written Exam yong ka DSC wa ka Exam MPSC.
Hawa yaklam wa u Andrew Shullai da kylli u kammon wa yoh u jia kamni hawa ka MPSC Cell em hi ko pyn hapoh ka yung krehkaam u DC kamjooh ka DSC kawa pynlai da ka yung krehkaam u DC hi tangwa ym em biang i yaklam ya pynbait ki.
Da ong u leh wa i kaamram ka DSC wa MPSC toh i jooh hi wow pynyakhun yow yoh kreh ya kiwa da pyndep ya ka puræ puthi wei lada toh wa tyngkhooh tarik toh u pynman da ki jait Exam wa phær ki kyrdan kam ki Technical Line kiwa yaphær na kitu kiwa yaleh yei kreh DSC.
Kam wow pynkynmoo ini wa dep da em leh ki seiñbhlang kiwa da lai ujor yeini hi tangwa neiliang ki bor District ym ye ki wow leh iyi iyi, wei ini da ktah ko ya kiwa boon wa yakhun ya ki Exam yaleh kreh, kamtæ u Andrew da ong u wym toh de wow jia ini neini chaphrang.
Neiliang u Jamshaphrang Pohtam da ong u wa ka pyrthai katni toh kawa dooh khih dooh kreh, iwa pynman ya kiwa boon ki khynroo wow yakhun thooh khih wow yakhun ya kiwon kiwon ki kaam du wow yoh kreh.
“Lada ka sorkar wailad ko na ka kti timun weileh won khanglaad ko na ka kti tidiang, kamwa mih ha kani ka yatyngkhooh tarik yong ka Exam DSC wa MPSC,” da ong u Jamshaphrang deiwa maham leh wym toh u e laad ya ka rukom thung kreh wow man ko kawa jakhlia tangwa toh u man deiwa khooid.
Chooh chooh da kyntu joor u khamtam ya u Chairman ka DSC wow em i sñiawthooh wei wow pynemkaam hok ya i bor wa i stat wa da e ha oo neibynta ini i kaam.
Neiliang u DC kamwa dadep ong u ya ki seiñbhalang, da pyntip u ynne leh wym ye de wow pynkylla ya ki tarik.
Discussion about this post