Jowai: Ki MLA warim u Hopeful Bamon, u Stephan Mukhim, deilang wa u Kynjaimon Amse, u Raja Suchen, u Eristone Rymbai, u Riborlin Shylla da yachem ki wa u symbood monrti rangbah ka jylla u Prestone Tynsong ha kani ka 21 tarik ha yung sah yow yaklam ya ki kaam pynroi ha East Jaiñtia Hills.
Ha kani ka yalang da pyntip cha u Prestone yei sih ka Rymbai-Bataw-Borkhat-Sonapur Road iwa da ktah ya ki paidbah wa im ha ki chnong Hingaria, Huroi, Lahalein wa Lejri. Da pyntip leh cha oo wa ya kani ka kaam chisien da dep yaklam wa u montri rangbah ka Meghalaya uwa da pyntip wa da em i pynslem wow chna ya uni u sarok. Da pyntip wa ya kani ka kaam da rah hakhmat ka High Court ka Meghalaya wei daw chong bichaar biang ya kani ka kaam ha kani ka 24 tarik.
Hadien wa tuklar ka High Court, i pynkhreh chna ya uni u sarok da sdang lai ko cha khmat na waroh arliang ka PWD waka NEC. Da pyntip leh cha u Prestone wa ka DPR wa pynkhreh da ka PWD Roads da pdiang ya ka da ka NEC, Shillong. Neiliang ka NEC, Shillong da phah ko yaka Draft SFC Memo ka Rymbai-Bataw-Borkhat-Sonapur Road (kawa jrong 39.25 km) hei dor wa T. 123.28 klur hapoh ka NERSDS cha u Joint Secretary (NEC), Ministry of DONER, New Delhi yow yoh yei mynjur naka DONER Ministry wei katni dang yang yow yoh yei mynjur naka Govt. of India.
Da e leh yaka dorkhat heiyatoh wa ini cha u Prestone wei da kyrpaad ya oo wow yaklam waka sorkar jylla kamjooh wa u Jitendar Singh, Minister of State (Independent Charge) I/c Ministry of DONER wa kamjooh waka yung krehkaam Prime Minister’s Office yow yoh yaka mynjur smat ya kani ka kaam naka DONER kawa daw yarap chiboon ya ki paidbah.
Neiliang u symbood montri rangbah da pyntip u wa ka sorkar jylla chimkhia ko ya kani ka kaam wei da dep chna leh daka Committee yow pait ya kani ka jooh ka kaam. Chooh chooh da pyntip u wa da dep pynman ya ki yalang da boonsien yow yoh yei mynjur waka muhor naka DONER Ministry, Govt. of Meghalaya. Wei da kular u leh wa ini i angnood ki paidbah ym slem de daw man kaam noh ko.
Nalor uni u sarok da yaklam wei da e leh ka dorkhat wow wow chna ya ki le tylli ki sarok wa kynthup yaka Lum Myrli-Wah Umpasu Road, Umkiang Pahar Road wa Jowai-Amlarem Road.
Da yaklam leh wow pynbiang ya ki Mobile Network khamtam cha ki chnong wa em cha khappood kam ka Hingaria, Huroi, Lahalein wa Lejri.
Kamjooh leh wow pynbiang bordiñ cha kini ki chnong ka Huroi, Hingaria, Lahalein wa Lejri neidaw wa ki tiar bordiñ wa pynemkaam da i bor ka sngi ym em yarap ko ya ki paidbah yow pynyoh bordiñ cha ki chnong wa em hapoh ka Narpuh Elaka, EJH.
Neiliang u Prestone da kular u wow chimkhia ya ini waroh.
Discussion about this post