Ka Meghalaya Government Primary School Contractual Teacher Association (MGPSCTA) da yachem ko wa ka seiñ FKJGP (WJH) ha JSTC Madankynsaw-Mowkyndeng, West Jaiñtia Hills ynnin ka 21 tarik heiwa neiliang ka seiñ MGLPSCTA da yahkhmat da ka Arbihlang Suchiang deilang wa ki dkhot.
Neiliang ka FKJGP (WJH) da emlang u Danny Shadap, Vice President FKJGP (JH), u Peter Ram Sutnga, Organising Secretary FKJGP (WJH) Laskeiñ Circle ryngkat wa kiwi tawan ki dkhot.
Kani ka seiñ yong kani kiwa sikai deiwa kreh Contract hadien wa ym lait ki dkhot yaka Exam MTET, da ong wa ka sorkar u beh kreh noh ko yaki iwa da pyntikna hadien i yachem wa u montri ka chnat puræ puthi u Lahkmen Rymbui ha Amlarem.
Neiliang kini kiwa sikai da pynsñiaw ki yaka yurim yong ki wa boon na kini kiwa sikai toh kiwa da sikai palat la 10 snem wei kamjooh leh kiwa da heh rta (Over Age) wow yaleh kreh thymme, katwa kamtæ ym em thaw lai ki cha kawi ka kreh lada beh na kani kawa katni.
Ka Arbihlang Suchiang da ong ko wa ka sorkar hap pyrkhat wei hap em ko yei sñiaw ya kini kiwa sikai khamtam wa da boon na ki da haap pyndap pynbiang ya ka yung ka sem.
Neiliang u Danny Shadap da kyntu u ya ka sorkar wow pyrkhat yillu ko ya kani ka kaam wei wow pyrkhat ko ya ka laad ka luti khamtam wow e laad biang yaki wow leh yaka Exam lane wow e da kawi ka jait Exam. Chooh chooh da ong u wa ka FKJGP smat ko wow yaklam wa ka sorkar heiyatoh wa kani ka kaam wa i chah beh kaam ya kitai kiwa sikai yow wanrah ya ka rai wa bha.
