Shillong: U Symbood Montri Rangbah ka jylla, u Prestone Tynsong da ong u wa i klam u Ardent Miller Basaïawmoit toh iwa khlem yurim, deiwa ong leh da neidaw wym em man u iyi iyi katni, da klam hi-eh katwa yoh wei i wym ye u pdiang.
Kam wow pynkynmoo heini, u Ardent Miller Basaïawmoit, uwa man u MLA warim ka Nongkrem da ong u wa i synchaar ka Meghalaya Democratic Alliance (MDA) ym yaphær i na i rukom synchaar ka BJP ha Delhi.
U Ardent da beiñ u leh ya ka sorkar jylla wa da khanglaad ko ya i lai Christmas Carol ha ka jylla, iwa pynyoo wa kani ka sorkar ngait ko ya ka sorkar u Modi iwa ban ya kiwa ngait niam Christan.
Hawa jubab yei klam u Ardent, neiliang u Prestone da ong u wa kammon u Ardent ye u wow ong wa i rukom synchaar ka sorkar MDA ym yaphær ko na ka sorkar BJP ha Delhi, deiwa pynrap wa ini i klam u toh iwa bakla neibhah wa ka sorkar MDA em ko jar jiar ki thong krehkaam wei da kyntu u ya u Ardent wow kiar u klam kamni.
Chooh chooh da ong u wa ka sorkar jylla, sñiawkhia ko wow chim i rai heiyatoh wow pynkhor ya ki kyndon lai Carol tangwa emkaam leh u yada nei poor ka kjut khlam COVID-19.