Kiwa yahkhmat yong ka chnat khynroo namo ka Youth Wing ka National People’s Party hapoh ka 1-Nartiang Constituency, ynne ka sngi da yachemlang ki ha Ummulong Community Hall yow pynman ya ka Youth Leaders Conference Cum Excellence Award for Sportsperson kam chibynta leh u ya tipmit para khynroo chwa wow lai luti chakhmat, wei ha kani ka jooh ka sngi da pynkup burom haroh ko ya ki khynroo kiwa da lehbha ha ki yalehke Sports ka thaaiñ wada rah naam rah burom yaka jylla waka ri, hei emlang u State President Youth Wing NPP, u Kitborlang Nongkrem, u Wailadmiki Shylla, MLA 2-Jowai kiwa ksohkaam Youth Wing na kiwi ki Constituency wa kiwi kiwi de.
U Mutshwa Thabah, General Secretary Youth Wing NPP 1-Nartiang ong u ymtoh de i por ya ki khynroo u pait donhi, tangwa u man noh kiwa yahkhmat wei kreh yei kaam, wei hawa yaroh ya ki kaam u MLA ka thaaiñ u Sñiawbhalang Dhar, da kyntu haroh u yaki paidbah u kyrchaan biang ki ya oo.
U Hamkom Khyriem, President Youth Wing 1-Nartiang hawa klam da ban joor u ya ki khynroo u man ki kiwa jai-jai hawa kreh wei lai luti yei kaam, khnang neiwa man jai-jai, kiwi won leh u sñiawsuk ki u wan emlang haka jooh ka lama.
Heijooh i por kyntu haroh u wymtoh won u man kiwa sñiaw sarong hawa ku.
U Kitborlang Nongkrem hawa klam da pynsñiaw u yei roi i paar wa ka sorkar MDA da leh ko hapoh i yahkhmat ka NPP la heiyatoh ki luti syngkieñ, u pynku yei kaam Sport, i rep i riang, i puræ puthi wa kiwi deiwa yaroh leh yaki kaam u Sñiawbhalang Dhar.
“Hajrong i pynbaad baam tooh yaka NPP deiwa ong kamai ko na Meghalaya yow pynheh yaka Party cha kiwi ki jylla, toh iwa bakla neibhah i jied u paidbah hi toh wa yieñ ko haka yurim u yada yaki jaitbru khian paaid,” ong u Phermanbha War Sohlang, General Secretary State Youth Wing NPP.
Neitæ hajrong i pynbaad wa kani ka sorkar dai ko yaki thaw cha khappood, ong u ma toh iwa sakhiat, u MDC Bajop Pyngrope, u MLA Kimfa Sidney Marbaniang kiwa naka Constituency wa haap khappood ym wan psiah ki cha ka NPP najrong kiwi won ki MLA.
U Wailadmiki Shylla da kyntu u yaka Youth Wing wym toh u krehkaam ko du heipor Election tangwa wot hadien wa jop leh, toh ki hi wow man kiwa yahkhmat neibynta u li ood yei emkaam i roi i paar.
Ong haroh u wa ha kini ki sngi ki bru ya wyrchaw ki ya kani ka sorkar wa yahkhmat daka NPP wa ki sorkar wada yoh u synchaar daki phaw snem, hei sakhiat toh u wyrchaw iyi wa da ye u leh du ha ka 5 snem.
Da yoh leh i klam na u Bormi Lyngdoh, President Youth Wing West Jaiñtia District, u Riki-O Shylla, u Dauni Phawa wa kiwi.
Ha kani ka sngi da em leh ka bynta yachem yumut næ kylli yukylli wei e jubab hapyrdi ki paidbah wa u State President Youth Wing NPP, u Kitborlang Nongkrem.
Kiwa chah pynkup burom ha kani ka sngi toh u Stephanson Pale, u Wadajied Ryngkhlem kiwa na Wahiajer, u Solomon Shullai na Moodymmai, u Sancity Pale na Nartiang Moodop, u Pormi Lamare na Namdong, u Luckyman Kynjing na Ummulong, u Obadaiah Kelphang na Saitsama, u Alexander Lyngdoh na Namdong wa u Tremiki Passah na Moodymmai.
