December 16, 2022
Ynne ka sngi u MLA ka Mowkaiaw, u Nujorki Sungoh hawa e yei klam ha ka yalang ka UDP ha chnong Samatan, da ong u wa i jia ha Mukroh heiwa da dooh hadooh san tylli ki mynsien bru da wanrah i yei sñiawsih ym du ha ka Constituency tangwa ha waroh kawi ka jylla.
Da ong u wa iwa jia ha Mukroh toh du nei kheiñstiñ ka sorkar jylla neibhah nadooh wa jop u, da pynsñiaw u wa em i eh wa i maa wei lada lai katkam wa kwah u tæ ini waroh ym jia i.
Chooh chooh da ong u wa ini i jia da pynkhyrngiat thiah i ya ka sorkar.
Heijooh i por da ong u wa hawa lai cha ki chnong ha Block-I sñiawsih u wow yoo ya i man i long ha kini ki chnong heiwa ki yung da tymmoh da u phlang, ki surok ki wym biang wei wot ka umdih leh wym yoh ki wei khamtam ki thaw sumaar leh wym em.
U Nujorki da ong u leh wa jooh ong u ya ki lok yong oo wa lada pait ha ka thaaiñ Labang Nongphyllut wa iwa pynyoo ha ki TV yei rukom im tynre, lada kwah u yoo ya ki da ki khmat toh u lai cha kani ka thaaiñ wow sakhi yei rukom im yong ki iwa man 50-60 snem nachwa i rukom im ki bru kiwa ha sor katni.
Da ong u wa ini i kaam Block-I toh iwi iwa oo angnood bha u wow klam wow parom cha ka sorkar khnang wa ki payu para, ki kur ki jait kiwa im ha Block-I u yoh ki yei roi i paar iwa salonsar kamwa yoh i.
Heijooh i por da ong u wa neiliang yong oo nadooh nachwa hadooh katni da dawa u wow pynku kyrdan noh ya ka Laskein C&RD Block kam ka Civil Sub-Division wei lada yoh laad u wa chisien ha kani ka kynti leh u dawa u ya ka Civil Sub-Division wei deiwa em kani ka Civil Sub-Division daw yarap ko chiboon ya ki paidbah.
