Kam chibynta i yalap Election MP chiteiñ samoi, neiliang u Symbood Montri Rangbah ka jylla, u Sniawbhalang Dhar, da lai yachem u ya kiwa yahkhmat kamjooh ki dkhot ka Niamtre Raij Nongjngi heiwa da kyrpaad u ya ki wow sñiawbha ki u e i kyrchaan neibynta u kyrtong ka NPP, u Dr. DRL Nonglait.
Hawa klam ha ka yalang, u Sniawbhalang da ong u wa kani ka Election man ko ka laad ka kabu u pynkhlan i yatylli, i chongsuk wa i roi i paar ka jylla Meghalaya. Da kyntu u ya ki paidbah wow yieñlang ki chirup khlem yakhlaad wei wow jied da u Dr. DRL Nonglait u wow rah yei sur yong ka jylla cha Parliament.
Da ong u wa ka Meghalaya em ko ka bor wa ka laad u ku, tangwa emkaam i yatylli hapyrdi ki paidbah, ki chnong, ki jaitbru wa ki ñiam waphær waphær.
“Hawa yieñlang i kam kawi ka jylla, ym em iwon iwon i eh wym ye u jop, i yatylli man ko ka yurim yong i roi i paar wa i chngaaiñ ki paidbah,” da ong u Sniawbhalang.
Neitæ da e khublei haroh u ya ka Niamtre Raij Nongjngi wei da kular u wow kreh dei kitkhlieh neibynta i myntoi ki paidbah, i bha i miat ka jylla wa ka mynried wa rap tyrchaaiñ ka Meghalaya.
Discussion about this post