Ynne i step heipor wa dang mih sngi, kiwa chong chnong ka chnong Pattaya, Thailand kiwa dang lai phet step wa kiwa lai luti ha rood ka Pattaya Beach da yoh ki wow riñ Video yei yachoh ki arliang iwa da poor smat ha ki Social Media hapoh ka ri Thailand.
Ini i Video wa ye phi u pait ha wah iwa jrong kamwa chi minit tam da yoh i wow riñ ya ini i yachoh kiwa antaad toh kiwa uiñke suwari kiwa na India wa ki tre chnong ka Thailand heiwa da yachoh yadat chynrang wa kynthai hapyrdi sarok heipor wa dang lai dang wa ki kari.
Najrong i ya bok ya kura, da ya rah dieñ wow yadat, da sai Belt, ki klong wei em leh wa rah da ki siang nar wa pynemkaam u chet u tu wei neidaw wa da yoo maa itæ i yachoh ym em wa nood u wan pynran deiwa tieñ ya mynsoo lang.
Ha ini iwa jia da sñiaw leh yei kiat ki kynthai yow yarap tangwa ym em wa wan wei ymtip leh hadooh katwon neh slem ini i yachoh.
Kiwa sakhi ya ini wa jia da ong wa yoo nyngkong ki ya ki chynrang wa kynthai kiwa man ki Thai kiwa chong dih kiad ha rood sarok chwa u jia ini wei da em kiwa uiñke suwari wa da ngait toh kiwa na India kiwa lai luti ha ka Beach, wei neidaw wym tip, kawi na ki ka kynthai India da lai ko wow pynkhor ya ka kynthai tre chnong khlem tip yei daw hadooh wa poi cha ini i yachoh yadat.
Kiwi won kiwa sakhi da ong ki wa kani ka kynthai India da khut ko ya ki lok yong ka hadien wym ye ko wow yachoh wa kani ka kynthai wei ini da wanrah i wow mih kiwi na waroh arliang yow yachoh yadat lang.
Ka chong Pattaya kattæ toh kawa da pynkhreh rap heh ha uni u snem yow lehkmen ya u snem thymme deiwa pynyklla yei dur kani ka chnong kam kawa chngaaiñ ya kiwa wan uiñke suwari wei kiwa boon da khuslai ki wa ini wa jia daw ktah i yei dur i dar ka chnong.
Discussion about this post