Ka Hynniewtrep Integrated Territorial Organization (HITO) da beiñ ko ya ka National People’s Youth Front (NPYF) yeiwa sdang ko wow pynim biang ya ki kaam wa yatoh wa u Uranium ha Meghalaya deiwa khyrwait ya ka Office Memorandum (OM) ka Union Ministry of Environment, Forest and Climate Change (MoEFCC) kawa pynmih ha ka 8 tarik u September, 2025.
Ki HITO da pynkynmoo ko wa ha ka 24 tarik u August 2009, ka sorkar wa khlieh da u (L) D.D. Lapang da mynjur ko wow e wai yei thaw wa heh 422 Hectare ha Nongbah Jynrin wa em katni ha South West Khasi Hills cha ka Uranium Corporation of India Ltd. (UCIL) yow wanrah ki kaam wa boon jait chwa wow sdang ki u tih Uranium ha Wahkaji.
Hadien ini da mih ka yakhih wa joor bha wei deiwa burom yei mon ki paidbah, ka sorkar u Dr. Mukul Sangma ha ka 1 tarik u August 2016 da pyndam noh ko ya kiwon kiwon ki kreh wa da leh ha ki thaaiñ Wahkaji da ka UCIL deiwa pyndam noh leh yei e wai yei thaw wa heh 422 Hectare ha Nongbah Jynrin wei deiwa leh kamni da khang da pynkut syndon yeini i kaam.
Kamtæ ka HITO da ong ko wa ini pynyoo ko wa ka NPYF kattæ kwah donhi ko wow yahbakla ya ki paidbah deiwa pynyabi yei thmu tih Uranium ha Wahkaji wa ka Office Memorandum ka MoEFCC neibhah kani ka OM da ong donhi ko wa ki mar pohkhyndaw kam ki Atomic Mineral wym emkaam de u pynman Public Hearing deiwa pynlait ya ka na ka EIA Notification, 2006. Tangwa ka Clause 6 kani ka OM da klam che ko wa hap wow em i yada wa biang katkam ki kyndon ka EIA deiwa pait leh kammon u ye u chah ktah ki bru, ki chnong ki thaw, ki um ki wah wa kiwi de iwa mut wa kani ka OM ym em e laad ko wow leh naphang wow tih Uranium wei lada ngiat wa daw yoh u tih Uranium toh iwa yahbakla ya ki bru.
Ka HITO da ong ko wa kani ka OM ym em mut ko wa da wai biang yei thih Uranium ha Wahkaji næ Nongbah Jynrin neibhah ya kani ka lynnong da khang ka nadooh u snem 2016 deiwa chim rai ka sorkar wei ym ye wow lai chakhmat khlem da yoh yei mynjur ki tre thaw, ka sorkar jylla wa ki waheh chnong.
Discussion about this post