Jowai: Ka Khasi Student’ Union, Tyrsad Circle lyngba ka Environment Cell kawa man kawi na ka chnat krehkaam kawa pait kyrpang du heiyatoh waka rymaw, kam wow sdang wow phrat luti wow wanrah ya i khooid i jngiar yong ki soodong sookun, ki wah khian, wah heh, da pynman ko ya ka pynkhooid ya ka wah Tyrsad ynnin ka 30 tarik.
Ha kani ka pynkhooid ya kani ka wah da wan chimbynta da ki khynnah skur yong ka Tyrsad Hihger Secondary School, Seng Khasi Secondary School Tyrsad, St. Vianney English School Tyrsad, Kyrphei Secondary School, ki seng samla chnong, ki khynroo khyllood seiñ niam waphær waphær, ki seiñ manbei, ki dkhot ka FKJGP Tyrsad Circle wei kamjooh neiliang ka Tyrsad Area Sport Association (TASA).
Ha chwa wow sdang ya kani ka pynkhooid da em ka yalang wa tbian heiwa da yoh yei klam yow pynsñiaw yei thmu yong ka Environment Cell iwa da klam da u Josterwell Rynjah Chairman yong ka Environment Cell KSU Tyrsad Circle wei da yoh leh ya i klam na u President FKJGP Tyrsad Circle u Batkhrawlang Rani, u President Synjuk Khyndai Shnong u Mokan Rynjah, ka Drosina Umdor wa na kawi ka manbei kawa embynta ha i bha i miat ha ka imlang sahlang, ka Dr. Jane Eufmia Warjri, u Khraw Rynjah General Secretary KSU Tyrsad Circle wa u Pynshai Rani President KSU Tyrsad Circle.
Ka seiñ da chim ko leh ya ki rai wow pynman ya ki yalap paidbah cha kiwa chong chnong wow burom yei khooid i jngiar ki wah wa ki chnong ki thaw, wym hoi u noh roi ya ki jhep khamtam ki Plastic, wow dam noh u sait kari harood ki wah wa kiwi kiwi.
Discussion about this post