Yakhih ki Christan ka Goa pyrchah ya u heh warim ka RSS hadien wa dawa u wow leh DNA Test ya u St. Francis Xavier

Ki Christan ka jylla Goa da mih paidbah ki wow chong kyllaiñ myngngor yow khang ya uwi u sarok hadooh wa chah dat lathi ki ha ki pulit.

Ini da jia i ynnin i miet hadien wa mih ki yow pyrchah yei klam u heh warim ka RSS Goa Unit, u Subhash Velingkar uwa da klam ki kyntien wa da ktah yei sñiaw ki Christan ka Goa.

Ki paidbah deilang ki heh ki seiñ pyrthai da mih ki ha Old Goa yow dawa kem ya u Velingkar wei da mih leh ki yakhih ha chnong Margao wa em ha South Goa heiwa heini da khang ya u sarokbah heiwa ki pulit da wan ki wow dat lathi ya kini kiwa pynman yakhih wei da chah kem leh 5 ngut.

Ynne neiliang ki heh Balang ka Goa da kyntu ki ya ki paidbah wow man ki kiwa jai jai wei wow pynneh yei suk i saaiñ.

Related posts

I maham na ka Dorbar Chnong Saphai ya kiwa wan lehkmen cha ka wah Kupli

December 25, 2024

Chongchit wei phooh phieñ ka lehkmen Christmas ha Jowai

December 25, 2024

Ini waroh da sdang i hadien wa u Velingkar da ong u wa toh u leh “DNA Test” ya iwa dang sah u St. Francis Xavier wei ymtoh wow kheiñ ya oo kam u “Goencho Saib” namo uwa yada ya ka Goa wei da toh u kheiñ ya u Blai ki Hinu, u Parshuram kam u “Goencho Saib”.

Hadien ini da yoh hadooh chi dorjon tylli ki ujor wa kynthup na u Chief Minister warim ka Goa, u Churchill Alemao yow dawa kem ya u Velingkar wei neiliang ka Liang Pyrchah ka Goa leh da beiñ ko ya u Velingkar deiwa ong wa da wanrah u yei sñiaw yaphær hapyrdi kiwa chong chnong.

U Velingkar leh da ujor kylla u ha ki pulit ka Old Goa Police Station deiwa ong wa em kiwa chim kabu wow yahbakla wow pynpoor ki khubor du wow pynkulmar ya kiwa chong chnong.

Ha kani ka ujor da ong u wa da klam u ini wadep chaphang i por wa ka Goa wa em ko hapoh i synchaar ki Portuguese heiwa da chah pynchitom ki bru wym em man kam ki Christan wei da toh por u pait deiwi yeiwa thoh ha ki History iyi mut i Sainthood lada toh iwa jia man sakhiat iwa kyntang wa khooid wa hok wei wow kylli leh yeiwa leh u Saint Francis Xavier hawa lai yalap u ya ka niam Christan.

Kamtæ da ong u wa iwa ong u ymtoh pyrchah ya kawon kawon ka niam iwa kylli donhi u yeiwa da jia heipor warim.

Da kam u leh wa i dawa wow leh DNA Test ya iwa dang sah u St. Francis Xavier toh iwa da dawa leh da ki Buddhist ka Sri Lanka wa hapoh ka pyrthai hi leh.

U St. Francis Xavier toh u Spanish Jesuit Missionary uwa dapoi ha Goa ha u snem 1542 heipor wa chah synchaar ko ha ki Portuguese wei da yap u ha u snem 1552 ha Sancian Island iwa em hajan ka Guandong Province ka China wei yeiwa sah u da booh ha yungmane Basilica of Bom Jesus ha Old Goa.

Ki pulit da pyntip ki wa u Velingkar da yut wei dang thooh ya oo.