Ka Khasi Students’ Union (KSU) da yachem ko ya u Montri ka chnat puræ puthi, u Lahkmen Rymbui wow yaklam hajrong i pynkrehkaam ya ka Common University Entrance Test (CUET), khamtam wow lait i doohnong ki khynnah ka jylla.
U Raymond Kharjana uwa man leh u Chairman ka Education Cell ka KSU, da ong u wa i yaklam wa u Montri da man bait i wa ki khynnah ka jylla ynmtoh wow chah ktah ki nei pynkrehkaam ya ka CUET, wei ka sorkar toh u bahkhlieh ko neibynta yong ki.
Da ong u wa neiliang ka seiñ da yoh ko yei kular na u Montri wow leh yeiwa bha tam wow yarap ya ki khynnah puræ ka jylla wei neiliang ka seiñ daw wai ko leh ya ki Coaching Class ha YouTube Channel wow yarap ya ki khynnah wow yakhun ya kani ka Exam.
Heijooh i por da ong u wa ka seiñ ym kwah ko wow yaklam lada i pynkrehkaam elaad næ pyndooh myntoi ko ya ki khynnah neibhah toh ka sien wa nyngkong wa pynkrehkaam ya ka, tangwa kwah ko wa ka sorkar u chimkhia ko khnang wow myntoi ki khynnah ka jylla.
