I chah thyllem kiwa boon ki dieñ yow chna ya ka Shillong Peak Ropeway Cable Car Project da wanrah i yei pyrchah heiwa da em wa yaleh mukotuma PIL ha ka High Court ka Meghalaya hajrong ini.
Hawa chong bichaar yeini ynnin da u Justice I.P. Mukerji, Chief Justice wa u Justice W. Diengdoh, Judge da ong ko katkam ka hukum wa da pynmih ha ka 24-06-25, da pynsñiaw ka yung bichaar yei sñiawkhia hadien kawa yaleh mukotduma da ong ko wa i chah ah ki dieñ wa boon da pynkylla ko yei dur i dar ka thaaiñ Lawsohtun.
Neiliang ka sorkar da e jubab ko ha ka 20-06-25 hajrong ini heiwa da thung ka High Court da ka State Level Committee yow pait yeini i thyllem ya ki dieñ kamjooh i ah ya ki chnat dieñ iwa ye wow wanrah yei maa yei mynsien bru wa kamjooh ki yung ki sem.
Ka High Court da phah ko leh ya kani ka Committee wow pait da ka hi yeini heithaw wow phah ha ki bru ka chnat Forest.
Ha ka 18 tarik uni u bnai won da yoh ya ka Report wa bniah na ka sorkar heiwa da pyntip wa kini ki dieñ wa da chah thyllem ha kani ka thaaiñ Lawsohtun ka East Khasi Hills toh neibynta wow chna ya ka Shillong Peak Ropeway Cable Car Project ha i thaw wa dang haap hapoh ka Raid Laban Reserve Forest iwa da leh da ka Tourism Department ka jylla hadien wa yoh bor (Clearance) na ka sorkar pyrdi.
Ha kani ka Report da ong wa ka sorkar pyrdi kam chibynta wow su kylliang da pynyoo ko ya ka sorkar jylla yei thaw wa em cha kawi won ka District wa hap wow thung dieñ tangwa u muktiar kiwa yaleh mukotduma da ong u wa ini ym yarap i ya kani ka thaw wa da chah ah ki dieñ.
Kamtæ ka High Court da e por ko ya kawa yaleh mukotduma wow e jubab hajrong kani ka Report wa da e ka sorkar.
Discussion about this post