Ynne ka sngi, ka Khasi Student Union (KSU) War Jaiñtia Circle hapoh i yahkhmat u Publicity Secretary u Michel Platini Mukhim wa u Vice President yong ka KSU Amlarem Area Unit u Ram Khyriem deiwa synran lang u Leningrad Tariang uwa man u Organising Secretary yong ka KSU Jaiñtia Hills District Unit, hajrong i ujor ki paidbah wa da jæd da pra wei ym em chngaaiñ de wow pynemkaam ya ka yingkieñ Lakroh da hiar lai pait ki ya ini.
Hei lai pait ka seiñ da chem wa i sih kani ka yingkieñ da man ko cha wa palat iwa da man i maa ya ki paidbah wa lai luti na kani ka yingkieñ kawa em ha ka chnong Lakroh, West Jaiñtia Hills District.
Kani ka yingkieñ toh kawa pynemkaam leh yow lai cha ki chnong Jholiakhola, Sankhat wa cha ka chnong Hawai Bhoi kawa man leh ka sarok wow lai cha ka chnong Muktapur ki chnong wa em khappood wa ka ri Bangladesh.
Neiliang ka seiñ da beiñ joor ko yaka sorkar wa lyngba ka chnat PWD kawa da ieh beiñ yaki chnong kiwa em ha ki thaaiñ khappood wei khamtam ya ki thaaiñ nongkyndong hadooh wa da booh hei maa ya ki paidbah khamtam kiwa em cha khappood.
Kamtæ neiliang ka seiñ da kyntu joor ko ya ki bor wa toh u pait wow chimkhia ya ini deiwa pynchna ya kani ka yingkieñ khnang wow pynsuk yei lai i wan ki paidbah katai ka thaaiñ.
