Jowai: Ki le tylli ki manyung naka chnong Lamin, West Jaiñtia Hills District da yoh kjut ki hadien wa baam ki ya u tit, heiwa ar ngut won da khlaad noh ki ynnin i janmiet katwa dang em ha luti wow pynkit cha ki thaw sumaar ha Jowai.
Kitai ki manyung kynthup yaka jait kur Khonglah, Maria waka kur Gashnga.
Katkam ka khubor na u waheh chnong Lamin u G. Gashnga da ong u wa haka sngi Wednesday kawi ka manyung kur Gashnga da lai khait tit ko, uwa jooh khut pyrtuid ki u tit khyndaw, ha i jooh i miet da ya baam ki, katwa i yoh kjut won da sdang na u pa ka yung haka sngi wa bood (Thursday) wei neitæ da yoh kjut sa kiwi ki dkhot ka yung heiwa da pynkit yaki wut wut cha Nongtalang CHC.
Haka sngi Thurday won sa ka kur Khonglah da lai khait ko ya u tai u jooh hi u tit wei da baam hei miet, deiwa e baam lang cha kawi won ka manyung yong ka kur Maria, heiwa ki leh haka sngi wa bood ka sngi Friday da yoh kjut ki.
Da ong wa hei sakhiat hei por wa wan khait katai ka yung yong ka kur Khonglah da em hi wa khang wow dam ki u baam, tangwa yoosar katwa toh u tit wa jooh ya baam hi, kamtæ da baam bait ki ha katai ka sngi.
Waroh kiwa yoh kjut da em 18 ngut katwa ki arngut wa khlaad won kynthup u Morison Dhar 40 snem uwa man u pa naka yung ka kur Gashnga wa u Kadilia Khonglah 26 snem.
Neitæ ynne ka sngi won 6 ngut da chait ki wei da yoh ki wow mih nei thaw sumaar, katwa 8 ngut won dang em ki hapyrdi i chah sumaar ha Jowai Civil Hospital, 2 ngut ha Dr. Norman Tunnel Hospital Jowai, tangwa ynne i janmiet uwi wa na Dr. Norman Tunnel Hospital da kyrriah noh cha Shillong.
Discussion about this post