Ki le tylli ki manyung ha chnong Saphai, West Jaiñtia Hills District, wa kynthup ya ar yung kiwa na ka jait kur Suchiang wa chi yung won kiwa na ka jait kur Shadap da maad ki yei jia wa sñiawsih hadien wa baam ya u tit khloo uwa da pna wan khait hi ki, wei napyrdi kiwa da yoh kjut, da em 4 ngut kiwa da khlaad noh katwa 6 ngut won dang em ki hapyrdi i chah sumar ha ki Hospital ha Jowai wa ha Shillong.
Katkam ka khubor wa da yoh na u waheh chong ka Saphai, u Gino Synnah, da khana u wa ki 4 ngut kiwa da khlaad kynthup ki ya ka Riwansaka Suchiang (8 snem) kawa da tlep ha ka 31-05-24, u Wansalan Suchiang (14 snem) uwa da tlep ha ka 01-06-24 wa u Tiplang Suchiang (11 snem) wa da tlep ha ka 02-06-24 wei kini toh kiwa na ka jooh ka yung ki khon ka Jumonlang Suchiang wa u Linus Sumer.
Sa kawi kawa yap toh ka Ana Suchiang (60 snem) kawa na kawi won ka manyung wei da tlep ya ka ynne ka 03-06-24.
Kini ki le yung da baam ki ya u tit ha ka 28-05-24 wei waroh kiwa da baam tit em ki hadooh kamwa 11-12 ngut katkam i khana u waheh chnong, wei nadooh ka 29 tarik da sdang u lai li booh ya kiwa yoh kjut cha ki thaw e sumaar.
Napyrdi ki 6 ngut wa dang em katni hapoh ki thaw e sumar, ar ngut da chah sumaar ki ha Nazareth Hospital Shillong, ar ngut ha NEIGRIHMS Shillong wei ar ngut won ha Jowai Civil Hospital Ialong.
Discussion about this post