I yakhih wow pyrchah ya ka Citizenship Amendment Act (CAA) ha nongbah New Delhi dang joor i wot hadooh kini ki sngi, ynnin da mih i awri hapyrdi ki ar liang kiwa kynthup ya kiwa pyrchah wa kiwa kyrchaan ya kani ka aiñ thymme ka sorkar pyrdi.
Ynnin ha ini i awri da yap hadooh 7 ngut wa kynyhup ya 6 ngut ki paidbah wa uwi u pulit Constable ka Delhi Police u Rattan Lal.
Neidaw wa joor ini i awri neiliang ki bor sorkar da pynkrehkaam noh ki da ka Section 144 CrPC i bynta North-East ka nongbah Delhi wei kani ka kyndon u krehkaam ko chi bnai.
Uwi na kiwa ya awri uwa da tip kam u Shahrukh da rah u ya ka pistol wei da siat u hadooh kamwa 8 kuli.
Ynnin i miet da joor leh i chah thang ki dukan wa ki kari ha ki thaw wa awri.
I awri awra da sdang i nadooh ka sngi Bibar wei da joor i ynnin ka sngi ha ki le thaw ha ki thaaiñ North East ka sor Delhi kiwa boon wa sah ki Muslim.
I sdang ini waroh da em wa ong toh neiklam uwi na kiwa yahkhmat ka BJP u Kapil Mishra uwa da maham ya kiwa pynman yakhih (Sit-in Protest) pyrchah yaka CAA wa daw kit yabor ya ki hadien wa mih u Donald Trump na India.
Ynne i sngi u montri ka kaam pohyung ka ri, u Amit Shah da chong yalang u wa u montri rangbah ka Delhi u Arvind Kejriwal, u Lieutenant Governor u Anil Baijal, wa u Police Commissioner u Amulya Patnaik.
Discussion about this post