Ha i ya tyrrah kari wa yoo chyrkhei, ar ngut ki bru da yap ki wei uwi won da mynsoo joor u hadien wa ka kari sorkar (Bolero) yong ka chnat Sports and Youth Affairs da chah tyrrah ko heipor wa lai luti ha u National Highway-6 hajan Umsaw Nongkharai, Ri-Bhoi District iwa da jia ynne i miet.
Ini da jia i heipor kamwa 8:00 waje i miet heiwa kawi ka Truck wa em Number ML-05L-4368 kawa wan neiliang Shillong da tyrrah ko ya kani ka Bolero wa em ya u Number ML-01-7455 kawa dang ku chaneiñ kawa pynemkaam ka District Sports Office, Resubelapara.
Ini i tyrrah man i iwa joor bha hadooh wa kani ka Bolero da pra ko phrai wei kani ka Truck won da kylla ko.
Hapoh kani ka Bolero da em le ngut hapoh heiwa ar ngut da khlaad ki pyn ha ini i thaw wa jia, katwa ya uwi won uwa da mynsoo joor bha da pynkit wut-wut cha thaw sumaar.
Kiwa yap kynthup ki ya u Sanbirth M Momin wa u Smart Sangma katwa uwa mynsoo toh uwa tip kam u Nilkash M Momin.
Uwa yah Truck toh u Anil Dorjee wei da em leh u Bibash Thapa hapoh uwa man kam u Handyman wei kini leh da mynsoo ki.
Neiliang ki pulit da kem ki ya uwa yah Truck wei da kit ya oo cha Nongpoh Police Station yow kylli takit ya oo. Katkam wa chem i takit wa nyngkong, kani ka Truck toh kawa thylli wei uwa yah ym ye de u wow yah ka heipor wa dang pynnoh heiwa da khun ko cha ka liang wym toh wei da tyrrah ko ya kani ka Bolero.
Ki pulit ka Nongpoh dapoi ki wut-wut ha ini i thaw wa jia yow pynman yei takit wei wow kyrriah ya kini ki kari yow lait u thut i lai i wan.
Discussion about this post