Yap kawi hadien wa joor chah Ragging | Ngat kyndon aiñ le ngut deilang wa u Professor

Ki pulit ka Himachal Pradesh da pynngat kyndon aiñ ki ya le ngut ki kynthai wa lai puræ deilang uwi u College Professor yeiwa pynchitom (Ragging) wei leh khlem-akor ya kawi ka kynthai wa lai puræ ha kawi ka College sorkar wa em ha Dharamshala.

Ha ki Video wa riñ ya kani ka kynthai ha i thaw wa chah sumaar ko, da khana ko hadooh katwon chah pyndik ko hadooh wow chah dat hapoh ka College Campus.

U pa kani ka khynnah da booh ujor u deiwa ong wa joor bha i chah leh Ragging ka khon u ha ki le ngut kiwi ki kynthai wa tip kam ka Harshita, Akriti wa ka Komolika ha ka 18-09-25 heiwa da chah dat ko leh ha ki heiwa da maham ki ya ka wym toh u khana ko ya kiwon kiwon. Ha ka ujor da pynmih leh yei pyrtuid u Ashok Kumar uwa man kam u Professor kani ka College deiwa pynbaad wa jrong kti u ka wei pyndik bha u yei pyrkhat pyrdaiñ ko.

Da ong u leh wa neidaw wa jia ini, ka khon u da joor bha chitom ko hadooh wa ktah yei chait i khiah ko wei da khlaad noh ko ha ka 26-12-25 heipor wa dang chah sumaar ko ha DMC Hospital wa em ha Ludhiana.

Kani ka khynnah toh kawa dang 19 snem wei lai puræ BA Second Year ko wei man ko leh kam ka Scheduled Caste wei ar ngut na ki kynthai wa pyndik ka leh toh ki SC hi katwa u Professor man u kam u Other Backward Classes (OBC).

Ki Video wa riñ yeiwa khana ko yeiwa jia ya ka toh iwa da poor bha ha ki Social Media wei ya kini ki Video da e kti leh cha ki pulit.

Related posts

Chah kem uwa tem pynheh yei sur “Kashmir Banega Pakistan”

January 3, 2026

Ya u President ka Venezuela daw bichaar ha New York hajrong ya ki kaam pyrchah USA

January 3, 2026

Katkam wa takit ki pulit, kani ka khynnah da sdang ko wow lai College ha u snem 2024 wei da pynbaad ko wa chah Ragging ko ha ki kattu katni kiwi kiwa lai puræ wei da dam ko wow lai College hadien wa pynmih Result ha u July 2025 hadien wa Fail ko ya ka BA First Year Exam wei da pyndam leh yei pyrtuid ko na ka College Roll ha ka 21-08-25. Kamtæ ha u bnai wa bood da lai ko cha ka College yow chim Admission biang heiwa da chah wow lai Second Year lada Pass ko manda leh ya ka Re-Evaluation tangwa lada ym lait ko daw hap biang ko wow lai cha ka First Year.

Uni u Professor won da kyntait u yeini wa chah pynbaad u deiwa ong wa hikai u ya kani ka khynnah heipor wa chong First Year ko wei da Fail ko ha ki le tylli ki Subject wa kynthup ya ka Subject wa hikai u ha ka First Year Annual Exam wei da lai ko cha ka Second Year deiwa dang leh ya ka Re-Evaluation wei da yachem u wa ka chisien donhi hadien ini.