Ka National Institute of Virology (NIV) Pune, ynnin da pyntikna ko wa i daw wa yap kawi ka khynnah wa dang 4 snem toh neidaw u khñiang Chandipura Virus katwa kiwi ki 15 ngut dang suba wa yap ki na uni hi u khñiang uwa da poor cha kamwa 13 tylli ki District ka Gujarat.
Ka chnat i chait i khiah ka Gujarat da pyntip ko wa da em kamwa 29 ngut kiwa da suba wa yoh ya uni u Chandipura Virus wei da em 15 ngut kiwa da yap wei kini waroh da yoh ki ki jooh ki dak ki chin hawa chitom ki.
Da pyntip leh wa na ki 29 ngut, 26 ngut toh ha Gujarat, 2 ngut na Rajasthan wa uwi na Madhya Pradesh kiwa da yoh ya uni u khñiang. Na ki 15 ngut kiwa yap 13 ngut toh na Gujarat wa mar kawi na Madhya Pradesh wa Gujarat.
Ki dak ki chin uni manda yoh ya uni u khñiang toh ka ka’oh, synrum, kjut khlieh, kjut doh wei chah ktah leh i jabieñ.
Uni u khñiang toh uwa ye wow rah da ki mait (Sandfly), ki thalah wei hei sien wa nyngkong da chem ya uni u Chandipura Virus ha India ha u snem 1965 ha chnong Chandipura, Maharashtra.
Ha u snem 2003-04 da joor bha uni u khñiang u poor ha India heiwa da em 322 ngut ki khynnah wa yap kiwa 183 ngut ha Andhra Pradesh, 115 ngut ha Maharashtra wa 24 ngut ha Gujarat.
Kamwa man kattæ ym pu em dawai wa ye u pynyap ya uni u khñiang.
Discussion about this post