Ha iwi i jia wa sñiawsih ha chnong Umtangling, kawa haap hapoh ka Umiam Police Station ha ka thaaiñ Umroi, Ri-Bhoi District, le ngut ki khynnah khian da dooh noh ki yei mynsien hadien wa chah riñ ki hei bordiñ u sainar 11kV uwa da tkut wei haap ha khyndaw.
Katkam ka khubor wa da yoh, ini da jia i ha ka 15 tarik uni u bnai heipor kamwa 2:00 waje i sngi, wei kini ki khynnah ym tip wei ym yoo ki ya uni u sainar bordiñ uwa da haap ha ka luti wa lai ki.
Hawa poi ha ini i thaw da chah riñ ki hei bordiñ hadooh wa dooh yei mynsien wei na kini kiwa khlaad, ar ngut kiwa 11 snem wa 12 snem toh kiwa chi payu.
Neiliang u waheh chnong ka Umtangling, u Bok Nongbsap, hawa klam da khana u wa ini toh i jia wym poi pyrkhat.
Da ong u wa chwa ini da pyntip wei da ujor u cha ka chnat MeECL hajrong i long i man ki sainar bordiñ wa da jan tkut, najrong wa sih u Transformer iwa da pynman ya ka chnong wow dooh bordiñ la kamwa chi tayaaw. Tangwa ym em wa chimkhia yeini da ka chnat wa toh u pait.
Ini wa jia da pynman ko ya ka chnong ka thaw wow yaam bru ko wei da kylli leh hadooh katwon man chngaaiñ i rukom pait yei pynlai ya ki sainar bordiñ.
Discussion about this post