Ar ngut ki khynnah chynrang uwi wa 10 snem i rta wa uwi won 11 snem i rta da yap ngam um ki ynne ka sngi Bibar ha kawi ka thlu umdih kawa dang dep tih wot ini wa dep wei ka wym pu em dep pynchna.
Ini da jia i ha ka chnong Sohmynting, West Jaiñtia Hills District iwa jngai du kamwa 12 Km haroh na Jowai.
Katkam ka khubor da ong wa heipor kamwa 12:00 waje i sngi, soo ngut ki khynnah da lai ki cha katai ka thlu umdih heiwa arngut da sum da kynthiar ki chapoh um katwa ar ngut won sum khlieh hi-eh ki.
Hadien wa ki ar ngut wa sum khlieh yoo ki wym mih de ki lok ki napoh um, da lai pyntip ki wut-wut cha ki bru heiwa ki paidbah leh da poi ki yow e yarap.
Tangwa neidaw wa ktieh ka um wei yillu, ki paidbah da chem chitom ki u thooh wei da phah wan ki da ka JCB yow pynlait luti yaka um u kai ko, wei manda rap stang ka um da chem ki ya waroh ar ngut ki khynnah wa da yap ngam um.
Kini ki khynnah wa yap ngam um da tip pyrtuid kam u Sambud Suting uwa 10 snem i rta, u khon yong ka Pynshngaiñ Suting wa u Chiruplang Ryngkhlem, uwi won toh uwa tip pyrtuid kam u Armiki Suting uwa 11 snem i rta, u khon ka Rida Suting wa u Shngaiñ Pyrtuh.
Discussion about this post