I chlai um ha Assam dang joor i hadooh ynne ka 22 tarik heiwa da em sa 21 ngut kiwa yap nei chlai um wei waroh kiwa da yap da em ki 31 ngut. Ka yukheiñ na ka Assam State Disaster Management Authority (ASDMA) da ong ko wa da em 5,64,146 ngut wa chah ktah ha ki 16 District.
Kiwa dang yap wot toh ha Sivasagar heiwa da em ki 13 ngut, 5 ngut ha Charaideo, 2 ha Golaghat wa uwi ha Jorhat.
Ki District wa chah ktah toh ka Biswanath, Charaideo, Dhemaji, Dibrugarh, Golaghat, Hojai, Jorhat, Kamrup, Kamrup (Metro), Karbi Anglong, Lakhimpur, Nagaon, Sivasagar, Sonitpur, Tinsukia wa Udalguri.
Neiliang ka ASDMA da ong ko wa em 872 tylli ki chnong wa chah ktah ha ki 44 tylli ki Revenue Circle wei ka um da tymmoh ko hadooh 24,210 Hectare ki thaw rep.
Ka Sivasagar da man ko ka District wa chah ktah joor bha heiwa da em 3.59 lak ngut wa chah ktah, bood sa ka Jorhat (87,662 ngut), Charaideo (72,646 ngut), Dibrugarh (18,615 ngut) wa Golaghat (16,799 ngut) wa chah ktah.
Wow yarap ya kiwa chah ktah, ki bor District da booh ki ya ki 273 tylli ki Relief Camps wa ki Relief Distribution Centre heiwa da em 1.14 lak ngut kiwa sah.
Wow yarap ya kiwa chah ktah da em i krehlang ka Indian Army, Indian Air Force, National Disaster Response Force (NDRF), State Disaster Response Force (SDRF), Assam Police wa ki bor District.
Discussion about this post