Ha iwi i jia wa sñiawsih iwa da jai ha Lad Mukhla ha rood ka nan Thadlaskeiñ iwa da antaad wa da jia heipor kamwa 11:30 ynne i step, da dooh yei mynsien ki ar ngut wa kynthup yei khynnah wa ar snem wei da mynsoo joor ka bei kani ka khynnah.
Ha ini wa jia, ka Truck 16 chaka wa em Number UP-76T-1960 da antaad wa nyngkong da tyrrah ko ya ka manbei wa tip kam Soowaki Sari kawa dang bahlang wa ka khon kawa tip kam ka Hawasan Sari heiwa ini i khon da khlaad noh i katwa ka bei dang em ko hei chah sumaar hapoh ICU ha Dr. Norman Tunnel Hospital, Jowai.
Kani ka manbei toh kawa dang wan chet-ja skur wei dang liwan ko cha yung heipor wa jia ini wei man ko kawa na Lad Mukhla.
Uwi na kiwa sakhi ya ini iwa jia uwa chah ban leh ka kari u da ong u wa da yoo wa lai kani ka kari khweng khweng wei da ban ko ya ka Maruti Eeco wa em Number ML-04E-0731 katwa ka kari yong oo ka Alto kawa em Number ML-04C-5529 da chah ban ko nakhmat manda kylla kani ka Truck tangwa oo deilang wa sa uwi uwa em hapoh ym em mynsoo ki wei da em leh sa kawi ka Alto kawa em Number ML-04D-3446 kawa da takha malu mala naphrang neidaw wa sied u Clinker wa kit kani ka Truck.
Kani ka Truck toh kawa lai cheiliang Shillong katwa ki kari khian won toh kiwa wan neiliang Shillong.
Hapoh ka kari Eeco won da em uwi donhi u bru wei da ye u sai oo hadien kamwa le kynta deiwa wan hadooh le tylli ki Truck khwe wa kawi ka pooh chi loom yow pynkhai ya kani ka Truck.
Katkam ka khubor wa da yoh, uni u bru toh uwa tip kam u Convince Sungi (26 snem) uwa na chnong Nangbah uwa dai baam dih cha wei da kit ya oo cha Jowai Civil Hospital Ialong tangwa da khlaad noh u.
Ya uwa yah ya kani ka Truck ym tip uwa neiwon wei da yut u leh na ini i thaw.
Discussion about this post