Uwi u bru wa tip kam u Deepak Mahavar uwa da ki boon boon snem wa man kam u bru wa lai kem pseiñ na ki yung ki bru, na ki thaw rep, ki yung skru wa em ha kylleiñ ka Guna District ka Madhya Pradesh, ha ka 14 tarik uni u bnai da chah pooh u ha uwi u pseiñ Indian Cobra hadien wa kieñ u oo kam labon ha rdang u heipor wa yah thuk-thuk.
Hadien wa chah pooh u Deepak da lai yah oo cha ki thaw sumaar tangwa da yap noh u hadien kattu katni kynta donhi.
U Mahavar toh uwa em 42 snem i rta wei uwa kreh (Part-Time) ha JP College wei man uwa pna tip hi wow kem pseiñ wei ha kani ka sngi wa chah pooh u da em i Video wa riñ ya oo deiwa em uni u pseiñ Cobra ha rdang u.
Katkam wa khubor wa da yoh, u Deepak da lai u cha chnong Barbatpura wa em kiwa khut ya oo wow kem pseiñ wei hadien wa kem u uni u pseiñ da ye wow thap oo hapoh u kynja klong tangwa chwa wow yoh u lai pynlait ya uni u pseiñ cha i thaw wa jngai na ka chnong da yoh Phone u na ka skur u khon u wa daw wai skur smat, kamtæ hap wan thooh oo smat.
Kamtæ deiwa jhan u lai thooh ya u khon da sai u ya uni u pseiñ napoh klong wei da kieñ u oo ha rdang u yow lait u haap na ka thuk-thuk wa pynemkaam u neidaw wa jhan wow lai thooh skur ya u khon u.
Ki pulit leh da pyntikna ki yeini heiwa da ong wa heipor wa lai luti da ka thuk-thuk, u pseiñ da pooh u ya u Deepak ha kti katwa dang mut u wow lai cha skur u khon u.
Da pyntip wa u Deepak hadien wa chah pooh dang ye u wow Phone cha u lok u yow paan yarap heiwa da lai rah ya oo cha Raghogarh Hospital wei hadien won cha Guna District Hospital wei heipor janmiet won da pynlait oo hadien wa sdang chait u tangwa hadien kattu katni por hadien wa sdang chitom biang u da lai rah biang oo cha Hospital heiwa da yap noh u chwa wow yoh u sumaar oo.
U Deepak da ieh u chadien ya ar ngut ki khon chynrang kiwa 14 wa 12 snem katwa ka kurim u toh kawa da khlaad chwa.
Discussion about this post