Yap uwi hei chah yooh ha ka Truck ha Mawryngkneng

Uwi u bru da dooh noh u yei mynsien hei miet ka 22 tarik hadien wa chah yooh ha ka Truck hajan Kynroh Maraw, Mawryngkneng ka East Khasi Hills.

Uni uwa yap da tip kam u Deilangshirup Law uwa wan da kawi ka kari wa em Number ML-10D- 0678 kawa wan na Jaiñtia Hills yow lai cha Shillong wei kani ka kari ki da chah tyrrah ko ha kawi ka Truck hei bynta wa khynnia u sarok wei kani ka Truck da yut ko mar ya jia ini khlem da sangeh.

U Deilangshirup da hiar u napoh ka kari yow pait yeiwa chah tyrrah tangwa heini i por da wan kawi ka Truck kawa da yooh oo kawa em Number ML-05D-1938 kawa yah da u Jewanmi Talang.

Kamtæ da mynsoo joor u wei da kit ya oo cha ka CHC ka Mawryngkneng heiwa da khlaad noh u hadien kattu katni por.

Yei metyap da e kti cha kiwa ha-yung ha-sem yow pyndep ki yeiwa emkaam wei ki pulit dang pynman ki yei takit.