Uwi u bru da khlaad u deiwa suba wa chah siat wei da mynsoo leh ki bru paidbah hadien wa da siat yaki bru wa pynman yaka yakhih ha Kanchanapur Sub-Division, Tripura ynne ka sngi heiwa uwa khlaad toh u dkhot ka Joint Movement Committee (JMC).
Ki bor ka aiñ da siat ki hadien wa em wa kawang moo ki wei da chah ktah kti ki ha kiwa yakhih.
Neiliang won u Tripura Law Minister u Ratan Lal Nath da ong u wa da em 19 ngut ki bru paidbah wa mynsoo, 4 ngut ki pulit, 3 ngut ki chipai ka Tripura State Rifles wa 8 ngut ki bru ka Fire Service kiwa da mynsoo.
Kani ka yakhih toh kawa pynman daka Nagrik Suraksha Manch waka JMC yow pyrchah yei e chnong e thaw yaki jaitbru wa tip kam ki Bru ha Kanchanpur, North Tripura.
Katkam ka khubor wa da yoh lum, kiwa pynman yaka yakhih da khang ki yaki sarok ha kiwa boon ki thaw hapoh ka Sub-Division wei da tympra wei thang ki leh yaki kari.
Kani ka yakhih pyrchah yei thmu wow e thaw yaki jaitbru Bru kiwa na Mizoram ha North Tripura toh kawa da sdang nadooh ka 16 tarik uni u bnai deiwa khut pynman daka Strike.
Ki jaitbru Bru toh kiwa da hap yut chnong wei da im ki haki Relief Camp wa da pynbiang yaki ha Tripura wa Mizoram nadooh u 1997 hadien wa mih ka ya awri wa ki Mizo, heiwa da em kamwa 30,000 ngut ki Bru kiwa da yut na Mizoram.
I yaklam wow pynyoh thaw sah yaki da sdang ko nadooh u snem 2009 da ki sorkar ka Tripura wa Mizoram tangwa i wym pu em man kaam hadooh katni. Ha u snem 2018 ka sorkar pyrdi da pyrchang ko wow e thaw ya ki Bru ha Mizoram tangwa neidaw wa pyrchah pyn da ki Bru hi da dam wow leh ya ini.
Ha uni u snem da soi yaka soskular wa ym pynbor yaki Bru wow lai phah liwan biang ki cha Mizoram. Neiliang ka sorkar pyrdi leh da pynkreh poisa ko T. 600 klur yow pynyoh thaw sah yaki ha North Tripura, Dhalai, Unakoti, Sipahijala wa Khowai District.
Ki tre chnong ka Tripura da pyrchah ki yeini deiwa ong wa ka sorkar da pyrchang ko wow e thaw sah ya waroh ki 6,000 ngut ki manyung ha Kanchanpur Sub-Division donhi. Heiyatoh wa ini, u JMC Chairman u Zairemthiama Pachuau da ong u wa hanla ka sorkar da kular ko wow e thaw du yaki 1,500 ngut ki manyung ha ini i thaw tangwa katni won da ku i boon ki wei da pyrchang wow e thaw ya 6,000 ngut ki manyung wei ini daw ktah ko yaka Sub-Division ha waroh i liang.
