Ka FKJGP War-Jaintia Circle deiwa ya krehlang waka FKJGP West Jaiñtia Hills District ha ka 2 tarik uni u bnai da pynman ki ya ka yalang paidbah hajrong i dooh bordiñ iwa awjan ar bnai nadooh ka 16-05-22 ha chnong Padubah kawa em hapoh ka Amlarem Sub-Division, West Jaintia Hills District.
Neiliang u B. Mukhim, President ka FKJGP War-Jaintia Circle da ong u wa ini i dooh bordiñ da ktah joor ko yei kaam i jaam ki paidbah khamtam ya ki khynnah skur kiwa dang pynkhreh ya ka Exam chiteiñ snem deiwa maham wa lada ym ye u pynyoh bordiñ daw khang tala ya ka yung krehkaam ka MeECL ha iwon iwon i por.
U Waheh Chnong ka Padubah, u N. Pohthmi da pyntip u wa da boonsien da lai ki cha ka yung krehkaam ka MeECL tangwa da pynslem bait ki katwa lada ha sor lada sih u Transformer du hapoh 1-2 sngi da yoh da uwa thymme katwa ha chnong ki da yang la duna ar bnai, deiwa kylli ileh wa ka poisa kiwa na sor wa kiwa cha palatsor yaphær ko mo?
U Wompher Wan, Organising Secretary FKJGP Jaintia Zone da pyntip u wa mar ya wan ki wow yachem wa ki bor wa pait yeini i kaam daw chim ki da kiwi ki laad ki luti wa eh lada ym mankaam deiwa kyntu u leh ya u MLA ka thaaiñ, u Lahkmen Rymbui wow chimkhia u ya ini wow pynyoh bordiñ ya kani ka chnong kawa da maad yei eh.
U Batskhem Myrchiang, Sport Secretary FKJGP Jaintia Zone da khana u wa ki leh da jooh maad ki ya ini i doohbordiñ tangwa iwa du hapoh chi tayaw da yoh biang, wei da sñiawkhia u wa hadooh katni wa da jan ar bnai wa dooh bordiñ kani ka chnong.
Kamtæ ha kani ka yalang da mih i sur wow lai yachem wa u Prestone Tynsong, Montri ka chnat Bordiñ ka sorkar jylla ha kini ki kajiak sngi wow wan.
