Ha ka 22 tarik u Naiynru uni u snem, ki pulit ka Phulbari PS, West Garo Hills da yoh yutip ki wa kawi ka manbei deilang wa i khon ko iwa dang chi snem chiteiñ da chah rahbor ki na yaw Rongkon. Yeini i kaam da takit da ka SI Chemetengsil A. Sangma heiwa ynnin ka sngi da chem wa ya kini da rah ya ki cha i thaw wa tip kam i Beltuli wa em hapoh ka Bilasipara Police Station.
Kamtæ deiwa ya krehlang ki pulit ka West Garo Hills wa ki pulit ka Dhubri da yoh wow lai pynlait ya ka bei wa i khon ko.
Heiyatoh wa ini da kem ya u Moni Zaman (23 snem) uwa na ka chnong Shyamding wa dang haap hapoh ka Phulbari PS, West Garo Hills.
Ya u Moni Zaman da wanrah cha Tura ynne i step yow li rah hakhmat ka yung bichaar. Wei ka takit da chem ko wa uni u bru toh uwa da jooh maham ya kani ka manbei kamjooh ya ka yung ka sem ha ka 31-03-22, ha ka 08-04-22 wa ha ka 09-04-22.
Ha iwi won i jia chah rahbor hi iwa da jia ha ka 30-06-22 heipor kamwa 5:30 i janmiet, wa da ujor cha ki pulit ka Selsella OP ha ka 01-07-22 wa arngut ki bru kiwa tip kam u Nur Alom uwa naka chnong Sakmal wa u Nazidur Islam uwa naka chnong Kandergaon kiwa haap hapoh ka Rajabala OP, da dat ki ya uwa ujor ha i thaw wa tip kam i Haldibari dei thmu wow rahbor oo hapoh ka kari ki tangwa da yoh u wow yut.
Hadien ini, kini ki jooh ki bru da dat biang ki oo ha i thaw wa em hapyrdi ka chnong Haldibari wa Babetpara wei heini i por da em soo ngut ki bru wa wan yarap ya oo wei da li booh ki oo cha yung u ha Rajabala.
Heiyatoh wa ini, ki pulit sa kem ki ya u Nur Alom (23 snem) uwa naka chnong Sakmal, WGH , u Moshaidul Sheikh (22 snem) uwa na Bhalgaon, WGH wa u Nazidur Rehman (23 snem) uwa na New Bhaitbari, WGH wei da phah ki hakhmat ka yung bichaar. Ka takit dang lai ko chakhmat.
