Ka jylla Meghalaya da yaleh ko wow pynku wei wow e laad ya kiwa kwah u seiñ khih dei yong idæ wei wow pynyoh kreh kylla won ya kiwi wei hajrong ini ka sorkar jylla da pynmih ko ya kiwa boon ki Scheme yow yarap u seiñ khih.
Hawa klam hajrong ini, u Montri Rangbah ka jylla, u Conrad K. Sangma da ong u, “Ka sorkar da wanrah ko chiboon wow pyrchang ha kini ki snem wa da dep wow pynchlur ya kani ka rukom seiñkhih da yong idæ deiwa pait yei sap yong ki bru wei wow pynbiang yei emkaam ki. Kawi na kini toh ka PRIME kawa da e chiboon i myntoi ya kiwa chong chnong ka jylla khamtam ya ki khynroo khyllood kiwa thrang wow seiñ khih.”
Da khana u leh wa hapoh ka ASPIRE won kawi na ki laad toh wow e sikai ya ki khynroo ha kiwa boon ki liang nadooh kiwa dang lai skur wa kiwi kiwi.
Neiliang kawa sdang ya ka GreenNE Origins, ka Ayoshee Beriwal kawa man kawi na kiwa seiñ khih ha ka jylla, da ong ko wa ka thong wow pynsñiawthooh ya waroh wow pait ki cha ki liang i chait i khiah, i pynmih ya kiwa bon ki jait baam nei thung i thep kam na u chirmit, u syiñ, ka umngap wa kiwi de.
Da khana ko wa i mar wa dai nyngkong ko toh chi yusong khian u chirmit pyn cha kiwa ha yung, ki lok ki jor wa kiwa ya krehlang. Da khana ko leh wa i em ka PRIME da pynkylla sakhiat ko yei rukom im ko hadooh wa da nood ko wow ieh noh yei kreh ko wei ym em sihlet ko hawa leh yeini deiwa sdang dei yong ka hi i khih neibhah katni da ye dai bha ko.
Ka Ayoshee da yoh sikai ko hapoh ka PRIME ha u Naichiphaw ynnin u snem wei da yoh mynoi ko chiboon kammon wow sdang yei khih wei da yoh ko leh wow lai cha Bangkok wa ki kynhun ka PRIME Meghalaya yow pynlai yaw ya ki mar cha kiwi ki ri ka pyrthai.
Hapoh ka PRIME da yarap wow e bai seiñ khih da ka ram kamwa T. 5 lak wei kawa ye u poi hadooh T. 25 lak.
