theme-sticky-logo-alt
theme-logo-alt
Advertisement ad1
Advertisement ad1

Chit khlieh wei sngoh miej u Adelbert hawa yaklam ya ki kaam khappood

Advertisement ad1

U MLA ka KHNAM na North Shillong, u Adelbert Nongrum da chit khlieh, da sngoh miej wei da kbai u hapoh ka Yung Dorbar Chna Aiñ hajrong ki phang pynbait pood wa ka jylla Assam ynne ka sngi.

Ya ka yukylli hajrong ka kaam pynbait bood wa da wanrah da u MLA ka Nongpoh, u Mayralborn Syiem heiwa da yatai awjan waroh chi kynta, wei da mih leh i chrai hadien wa u Adelbert da kylli u ya u Montri Rangbah lada nood næ ym nood u wow pait biang deiwi ya ka soskular (MoU) wa da yasoi hapyrdi ka Meghalaya wa Assam.

Advertisement ad1
Advertisement ad1

Hapyrdi ini i ya kylli, da mih ka pynyoo nia kawa joor hadien wa u Montri Rangbah da ong u ya u Adelbert wow khana khlem pait kot yei pyrtuid ki chnong wa em i ya kajia heiwa u Adelbert da ong u wa ym toh i kaam yong oo wei da yieñ sa u Symbood Montri Rangbah, u Prestone Tynsong uwa da ong wym toh u leh Drama wei leh Emotional wei neiliang u Lamphang ka Yung Dorbar, u Metbah Lyngdoh da hap u wow tem noh yei yania.

Hawa jubab ya iwa kylli u Bah Adelbert, u Montri Rangbah, u Conrad K Sangma da kylli kylla u ya u Adelbert lada dep u wow lai cha kini ki thaw wa ya kajia pood wei lada ye u wow kdaw iyi i chnong wym hun u neibhah ym ye u jubab ya oo khlem da kylli da iwa kdaw che. U Adelbert da ong bait u wa ym em ya syllok wa waroh kiwa daw chah ktah.

Hawa jubab chooh chooh, u Conrad da ong u wa ka sorkar ka nood ko u lai chakhmat wa i yaklam pynbait pood wei da dep wow yachem wa ki seiñbhalang, da dep wow yachem wa u Montri Rangbah ka Assam wei i rukom klam u Adelbert toh i klam khynnah. U Conrad da ong u leh wa pdiang yei e yumut hajrong ini i kaam wei kamjooh da pdiang yei chah kynthah wei chah pynbaan kiwa ye u tei.

U Montri Rangbah da khana u wa ha ki phra bnai wa da lai, ka yaklam pynbait pood da pynman la 8 tylli ki yalang wa kyrpang, kiwa kynthup 2 sien wa ki seiñ sainpyrthai ka jylla, wa 2 sien wa ki seiñbhalang wei da em leh ki yalang wa man-i-por da ki Regional Committee.

Share this:
Previous

Yarap ka PRIME wow pynchlur ya kiwa boon wow seiñ khih

Next

Da ki Jersey thymme yoh kiwa yalehbol ka Bataw Umsoo Football Club