Ka High Court ka Meghalaya hawa bichaar ya ka mukotduma PIL heiyatoh wa i pynkyllooid ya ka sor Shillong, da ap ko yeiwa da pynkhreh ka sorkar kawa da dep thied ya ki Bus boon tylli yow li thooh li booh ya ki khynnah skur wei yow pynchlur ya ki manbei manpa kiwa khuslai ya ki khon kynthai yong ki hawa pynemkaam ya kini ki Bus, neiliang ka sorkar da pyndait ko wa ki CCTV Camera kamjooh da pynlait ko leh ya ka Mobile App yow ye ki bei ki pa u tip heiwon em ka Bus ha iwon iwon i por.
Ka yung bichaar da yaroh ko ya ini i Real-Time Passenger Information System heiwa da ye wow tip thij heiwon em ki Bus wei heiwon poi ki katkam i por wa lai luti ki wei ini daw pynwiar i yei artatien ki manbei manpa yei man chngaaiñ ki khon ki heipor wa pynemkaam ki ya kini ki Bus.
Kamtæ ka High Court da ong ko wa dang emkaam leh kiwi wa hap u leh yow pynkyllooid ya ki sarok deiwa chna chooh ki sarok, ki thaw pynyieñ kari, u booh ya ki luti One-Way wei lada ye wow chna ya ka Flyover na Rilbong cha Jhalupara daw yarap bha ko wow pynduna yeini i khynnia.
Hajrong ini waroh ka High Court da e yaroh ko ya ka sorkar deiwa pynchlur wow pteiñ chooh chooh ya ini i kaam wei daw chong bichaar biang yeini ha ka 07-07-23.
Ka sor Shillong toh kawa da chah ktah bha nei khynnia kari khamtam heipor lai kreh, lai skur wei heipor liwan ki bru wei katkam ka yukheiñ ka sorkar da em 13 tylli ki kari wa da thied thymme ha ka chi sngi wa 14 tylli ki ar chaka wei najrong ini, 60% kiwa lai skur toh kiwa pynemkaam da ki kari yong yung ki.
Yow lait na ini, ka sorkar da dep ko wow thied 30 tylli ki Bus wow pynemkaam lang wa tip kam ka STEMS (Sustainable Transport and Efficient Mobility Society) da ka thong wa kawi ka Bus toh ka wow pynduna yei pynemkaam 15 tylli ki kari iwa mut heipor wa boon kari bha, kini ki 30 tylli ki Bus daw pynduna ki ya 450 tylli ki kari wa mih cha sarok najrong wow pynduna leh yei joor i tdem.
Neiliang u Montri Rangbah ka jylla, u Conrad Sangma leh da pynsñiaw u yei kmen yeini i yaroh ka High Court deiwa ong u wa ini i leh ka sorkar toh iwa daw pynkylla yei lai i wan wei man ko leh ka sien kawa nyngkong ha thaaiñ North East wa em kam kini ki Bus wa em ya u GPS Tracking, ki CCTV deilang wa kiwa pynlai ya ki leh toh kiwa da e sikai bha wei ini waroh daw pynchngaaiñ ko yei lai i wan.
