Ka Ministry of Housing & Urban Affairs ka sorkar India da e yaroh ko ya ki bru kiwa da chimkhia wow pynkhooid ya ki luti ki syngkieñ ki chnong wa ki thaw kiwa da jooh kheiñ kam ki thaw noh jhep. Kini ki bru khlem da kwah burom deiwa ksoh u saroo ha kti da pynkylla dur ki ya ki thaw paidbah kamwa chimkhia yei khooid i yung yong ki hi.
Da ong leh wa i pynlang yei jhep ha ki thaw sor toh iwa da yaklam neipor cheipor tangwa ha Meghalaya i khooid i jngiar toh iwa da myllien chwa hei yong samen. Ki klong Plastic, ki Aluminium Can kiwa da sah da ki phaw snem toh kiwa da ieh khlem da em wa pyrkhat. Wei deiwa pyrkhat yeini, ka chnat Urban Affairs ka Meghalaya da wanrah ko ka Policy deiwa pynchlur wow chimbynta kiwa chong chnong kam chibynta ka National Swachhata Hi Seva Campaign.
Hapoh kani Campaign da pynkhlan yeini deiwa em kitu kiwa da leh yei kaam dei bor yong ki hi wow pynlang ya ki Plastic kam ka nongmuna ya kiwi wow bood ki.
Ha Dulong, Jowai, u Raju Najiar dang step da khai u wow pynlang ya ki klong, ki Can wa da noh ki bru cha ki luti ki syngkieñ yow pynman ya ka chnong ka thaw kawa khooid.
U Shynnaki Dkhar won na chnong Nongkynrih, West Jaiñtia Hills District hanla man u uwa duna hei bor i doh i pran, khlem da dooh mynsien da pynlang u yeiwa noh roi hapoh ka chnong wa ki thaw wa em chajan. Kiwa chong chnong da ong ki u Shynnaki toh uwa lai pynlang ya ki Plastic, ki klong wa kiwi de kiwa da noh roi hapoh ki dong ka chnong wei dei bor samen u da ye wow wanrah yei khooid i jngiar hapoh ka chnong ka thaw.
Ha Upper Mawprem, Shillong, u Deba Prasad Ghosh da ki snem toh uwa da yarap wow pynkhooid ya ki dooid wa ki jhep. Hawa klam ya ki kaam wa da leh u da ong u, “Da leh O yeini kattu la 20 snem. Hei step da yoo O wa kiwa kreh ka Municipal da wan ki wow pynkood yei jhep. Nga won da pynkhooid O ya ki dooid wei hei pyrkhat O wa deiwa pynkhooid ya ki dooid daw lait ki bru nei kjut i chitom iwa pynkhia ya ka imlang sahlang.”
U Airborlang Lyngdoh Marshillong uwa na New Nongstoin, West Khasi Hills District, won toh uwa da kreh yow wanrah yei pynsñiawthooh paidbah uwa da lum wei jied ya ki Plastic wa ki jhep yow yahluti ya kiwa chong chnong ha ka luti wa miat wa bha deiwa pynyoo da ki kaam.
Kam wow kyrchaan ya kiwa chong chnong, ka chnat Urban Affairs ka Meghalaya da sdang ko ya ka Green Deposit Scheme ha uni u bnai ha kiwa boon ki thaw uiñke suwari kam ha Sohra wa Dawki, heiwa da su poisa ya kitu kiwa pynuiñ pyndong ya ki klong kamjooh ki yusong ya ki jait dih waphær waphær yow pynchlur yei myllieñ wa bha.
Discussion about this post