Ynne da man ko ka sngi wa nyngkong wa pynyoo paidbah ya ka phlim wa thymme wa da pynmih napoh Ri-loom Jaiñtia kawa pyrtuid ‘Ka Chithi’ ya kawa da pynwandur da ka Simi Khongtiang kam ka Director.
Ya kani ka phlim da pynyoo paidbah ha Yungwalieh ka Panaliar, heiwa da yoh yaroh ko na kiwa boon.
Hadien wa pait ya kani ka phlim neiliang u Le Laloo uwa na Loomkyrwiang da ong u wa kani ka phlim toh kawa yoosuk bha, kawa ktah ya i rukom im ki bru liang wanang nadooh ka imlang sahlang wa kiwi kiwi khamtam ya kawi pa kawi ka manyung lada wyrchaw ya ki por nachwa wa i por katni.
U Mario Sun uwa na Nongstoin da e khublei u ya ka Simi Khongtiang wow ku wei wow lai ko chaphrang deiwa ong wa kani ka phlim toh kawa yah kawa wa kdaw luti ya ki manbei manpa wow pynlai ya ki khon yong ki neibhah kani ka phlim toh kawa pynjoo umkhmat ya oo.
Uwi won uwa da wan pait ya kani ka phlim, u Dameyoki Dkhar wa tip leh kam u RJ Meyo da yaroh u ya ka phlim deiwa ong wa kani ka phlim man ko kawa emkaam wow yoh i sneiñ i kroo khamtam ya ki paidbah neibhah ym sihlet ki.
Kam wow pynkynmoo ya kani ka phlim daw pynyoo ya ka hadooh ka 6 tarik ha Panaliar wei neitæ nadooh ka 18 tarik hadooh ka 23 tarik uni u bnai ha District Library, Mynthong Jowai heipor 2:00 waje i sngi, 4:00 waje nohchariñ ka sngi, 6:00 waje i janmiet wa 8:00 waje i miet.
Discussion about this post