I pynkhreh da ka sorkar Meghalaya deilang wa ka Meghalaya Football Association (MFA) ha Shillong yow pynman ya ar tylli ki International Football Match wa daw yalehkelang ka India (Senior men’s team) ha u bnai wow wan da lai ko chaaid chaaid chakhmat.
Heiyatoh wa ini, neiliang u Assistant Coach ka India, u Mahesh Gawali da wan u cha Shillong ynne yow pait ya ka JN Stadium deilang ka Practice Ground wa em ha North Eastern Hill University (NEHU) hadien wa ka All India Football Federation da pyntikna ko ha uni u bnai wa ka JN Stadium daw pdiang ko yei pynman ar tylli ki International Match wa kynthup ya ka FIFA Friendly Match hapyrdi ka Maldives wa India ha ka 19 tarik u March wa ka AFC Asian Cup 2027 Qualifier hapyrdi ka India wa Bangladesh ha ka 25 tarik u March.
U Gawali da yaroh u ya ka JN Stadium, deiwa ong wa man ko kawi na kiwa miat dooh ki madan yalehbol hapoh ka ri kawa da yirngam bha, kawa biang thaw chong kamjooh ki kamra neibynta kiwa yalehke.
Neiliang ka MFA da emlang wa u Vice-President, u Cliff Nongrum heiwa da yaklam wow pynhreh ya ki kamra wa chipor deilang kiwi de ha ka Practice Ground wa em ha NEHU.
U Gawali da ong u wa lada ka Practice Ground em ko ki thaw wa emkaam wa man wa pura, ka Shillong da man ko kawa da biang wow pynman ki yalehke wa man katkam ka International Standard.
Ka India toh kawa da em ha ka Group C ka AFC Asian Cup 2027 Qualifiers Final Round deilang ka Hong Kong, Singapore wa Bangladesh wei daw yaleh ki deiwa yachem kawi ya kawi mar ar sien (Home-and-away round-robin format) hadooh u March 2026. Wei kiwa jop ya ka Group daw yoh ki wow psiah cha ka Asian Cup Tournament.
Discussion about this post