Ha ka 16 tarik uni u bnai ka Dorbar Chnong Kuliang da ksoh ko ya ki 11 ngut ki bru wa wan psiah na Bangladesh kiwa kynthup ya ki kynthai, chynrang wa ki khynnah kiwa thmu wow wan psiah cha India khlem ki kot ki sla wa biang lyngba kani ka chnong.
Hawa takit ya ki, da phla ki wa em ki bru na Kuliang kiwa da yah luti ya ki, wei da ksoh leh ya ki arngut kini ki bru wa wan na kani ka chnong heiwa da kem leh ya uwa yah ya kawi ka kari wa em u Number AS – 12Z-7069 uwa na Katigorah Cachar District, Assam.
Ya kini ki bru, neiliang ka Dorbar Chnong Kuliang lyngba u Secretary Chnong, u Perwon Nongpluh ryngkat wa ka Deiwi Tongper kawa man ka President ka STIEH da e kti noh ki ya kini ki bru ha ki pulit ka Umkiang PP wow leh yeiwa emkaaam katkam ka aiñ.
Heiyatoh wa ini waroh neiliang u Montri wa pait ya ka chnat ki kaam pohyung ka jylla, u Lahkmen Rymbui da ong u wa ki dkhot ka Village Defence Party (VDP) ka chnong da yoh kem ki ya kini ki 11 ngut na kawi ka kari wei da ksoh leh ya ki 2 ngut ki tre chnong wa uwa yah ya kani ka kari uwa na Assam.
Da yaroh u leh ya ki VDP wa kiwa chong chnong Kuliang kiwa da krehlang wa ki pulit hadien wa da ksoh ki ya kini ki bru wei da pyntip ki wut-wut cha ki pulit wow kem ya ki.
Chooh chooh da ong u wa waroh ki District ryngkat i krehlang wa ki VDP ki chnong ha ki thaaiñ khappood, da paitsiar bha ki wow yada nei wan psiah tooh ki bru na Bangladesh, wei neiliang kiwa chong chnong pyntip ki cha ki pulit lada em ki bru wa chonkhmat ki.
